Janella sa Elnella fans: Huwag na lang magsabi ng masakit na salita!

JANELLA SALVADOR AT JAMESON BLAKE

GOODBYE ElNella na nga ba at hello JameNella na?

Si Hashtag Jameson Blake na ang bagong ka-loveteam ni Janella Salvador sa latest romcom offering ng Regal Entertainment na “So Connected”.

Inamin ng dalawang Kapamilya youngstars na maraming nam-bash sa kanila sa social media nang mabalitang sila na ang bibida bilang tandem sa bagong pelikula ng Regal Films, kabilang ang fans ni Elmo Magalona na dating ka-partner ni Janella,

Sa nakaraang presscon ng “So Connected”, sinabi ni Janella na naiintindihan niya ang tampo ng fans nila ni Elmo pero nakiusap siya na sana’y huwag naman silang personalin ng mga ito dahil wala naman silang ginagawang masama ni Jameson.

“Well, siyempre naman na hindi maiiwasan na they felt bad, they’re hurt, and some of them released some hurtful words. But ako naman, naintindihan ko rin naman sila.

“Siyempre they will get hurt, siyempre they’re rooting for two people to be together, and naghiwalay.

Pero at the same time, I understand them, but sana lang, if they don’t like to support the movie, don’t say some hurtful words na lang, di ba?” ang paliwanag ng singer-actress.

Hirit pa ng dalaga, hindi naman mawawala ang mga bashers, kahit na ano raw ang gawin niya ay siguradong may mga hater, “Ako lang kasi, iwas negativity ako, so all I want to say is, sana if you want to support the loveteam, support niyo the loveteam you want to support, but you don’t have to say harsh words to others. They’re not just for the ElNellas but for the other fans na rin.”

Sey naman ni Jameson, “Well, actually hindi naman ako masyadong sanay sa mga bashing. Pero I’ve started experiencing it nu’ng ano, dahil sa team-up namin (ni Janella). There are some hurtful words din, that’s their opinion, that’s what they think.

“They were saying na user ako, na ginagamit ko lang siya para sumikat ako. I don’t know, that is too much. I’m just doing my job. If they think it’s bad, it’s up to them, it’s their opinion. Ako kasi, personally, I really don’t care talaga, peaceful ako, deadma lang ako sa mga ganu’n.

“Sana before they say anything, let them watch muna (So Connected). I understand na kahit iba yung ipinartner, sana support na lang,” sey pa ng Hashtag member. Aniya pa, may mga ElNella fans din naman daw na handang sumuporta sa pelikula nila ni Janella.

Ayon pa sa rumored girlfriend ni Elmo, nanawagan na siya sa ElNella supporters, “I actually already told them what I want them to know na, I understand naman their pain siyempre seeing their two idols na mag-work separately.

“It really is hard for them. But yun, sana lang, they will be smart with their words and they don’t try to hurt people intentionally for whatever reason.

“And if you have to fight back, kunyari merong nag-ano sa ‘yo, kung gusto nila mag-fight back, think about muna 100 times before you fight back. And make sure kung yung sasagutin mo is still not gonna hurt the other person, not meant to hurt, but meant to defend yourself lang,” aniya pa.

***

Samantala, umaasa si Janella na susuportahan pa rin siya ng ElNella fans kahit may bago siyang partner sa “So Connected”, “Siyempre, love ko naman lahat ng fans, pero like I requested din sa mga tao, sana after everything, mas okay na rin na hindi ako i-pair sa isang person consistently.

“I believe kasi na mas maggo-grow ako as an artist kung makakatrabaho ko ang iba pang magagaling na artista natin. I realized that it’s gonna help me grow in my career. It’s gonna help me discover things about myself when it comes to acting,” dagdag pa ni Janella.

In fairness, ang fresh ng look ng tambalang JameNella at napakaganda rin ng trailer ng “So Connected”, very millennial ang dating nito. Pero promise ng dalawang bagets, hindi lang para sa mga millennial ang kuwento ng pelikula kundi para sa buong pamilya.

Mula simula raw hanggang ending ng movie ay pampa-good vibes lang at pa-happy lang.

Showing na sa May 23 ang “So Connected” sa direksyon ni Jason Paul Laxamana. Makakasama rin dito sina Ruby Rodriguez, Rolando Inocencio, Cherise Castro, Krystal Brimner, Paulo Angeles, VJ Mendoza, Chai Fonacier at Rafael Suduyan.