Kim Domingo nagsabog ng kaseksihan sa Thailand, bagong Pantasya ng Asya

BONGGA ang GMA Artist Center star at bagong Pantasya ng Bayan na si Kim Domingo, ha!

Isa lang naman siya sa mga naimbitahang maging special guest sa Viral Fest Asia 2017 na ginanap nitong nakaraang linggo sa Bangkok, Thailand. Tampok sa music festival na ito ang ilan sa mga impluwensyal na personalidad sa buong Asya at layunin nitong ipakilala pa sila sa buong mundo.

Kasama ang ilan sa mga sikat na mga personalidad ng showbiz at maging sa social media, napa-wow ang mga tao kay Kim matapos sumali ang dalaga sa isang diskurso tungkol sa kahalagahan ng new technology sa iba’t ibang negosyo.

Sa forum na pinamagatang “Selling to Millennials: Influencer Marketing and Commerce”, ibinahagi ni Kim ang tungkol sa kahalagahan ng social media sa pakikisalamuha sa kanyang mga fans. Tinalakay din niya ang iba’t ibang oportunidad na nakukuha niya mula sa mga advertisers dahil sa kanyang social media presence.

Matapos ang forum, nakisaya si Kim habang pinapanood ang iba’t ibang performers gaya ng Korean superstar na si Rain at Japanese Pop girl group na AKB48.

Nagpahayag din ang Kapuso star ng kanyang pasasalamat sa pagkakataong binigay sa kanya na makasama sa nasabing festival.

“Nakakatuwang makita na magkakasama ang iba’t ibang Asian artists na nag-eenjoy at nagpe-perform. Sa akin naman, thankful ako kasi naimbitahan akong maging part nito at nakakilala pa ako ng new friends,” paliwanag ni Kim.

Naging matagumpay naman ang layunin ng festival kay Kim dahil dumami lalo ang kanyang followers mula nang mai-upload ang litrato niya kasama ang beteranong Indonesian multimedia star na si Raditya Dika sa Instagram account ng huli. Napansin ng mga Indonesians ang ganda ni Kim sa litrato na nakalikom na ng halos 300,000 likes.

Tila, hindi lang sa Pilipinas patok ang ganda at kaseksihan ni Kim Domingo. Karapat-dapat na rin siguro siyang tawagin ngayon bilang Pantasya ng Asya.

q q q

Bongga rin ang mga fans nina Jennylyn Mercado at Gil Cuerva dahil talagang nag-e-effort sila sa pagpo-promote ng GMA Telebabad series na My Love From The Star sa social media.

Kaya naman gabi-gabing nagte-trending ang serye ng Kapuso Network bukod pa sa mataas na rating na nakukuha nito. Kaya naman nagpapasalamat nang bonggang-bongga ang tambalang JennyGil sa lahat ng mga sumusubaybay sa MLFTS at sa mga nagpo-post ng magagandang mensahe sa social media about the show.

Siguradong pinag-usapan na naman kagabi ang episode ng MLFTS na may hashtag na #MLFTSCaughtOnCam.