Opisyal ng SEC inireklamo sa Ombudsman

Isang opisyal ng Securities and Exchange Commission ang may nakabinbing reklamo sa Office of the Ombudsman kaugnay ng pagpayag umano nito sa maanomalyang transaksyon sa shares ng Manila North Harbor Port Inc.
Naghain ng reklamong kriminal at administratibo sina Mark Roy Boado, representative ng Harbour Centre Port Terminal Inc., at shareholder na si Nathaniel Romero laban sa Company Registration and Monitoring Department director ng SEC na si Ferdinand Sales.
Ito ay kaugnay pa rin ng away ng negosyanteng si Reghis Romero at kanyang anak na si 1-Pacman Rep. Michael Romero sa pagmamay-ari ng HCPTI.
Ayon sa mga nagrereklamo, ang aksyon ni Sales ay nagresulta sa pagpapalit ng may-ari ng MNHPI na hindi dapat mangyari habang mayroong intra-corporate dispute sa HCPTI na siyang orihinal na nagmamay-ari nito.
Sa pagpayag ni Sales na palakihin ang capital stocks ng MNHPI ang naging majority stock owner na ay ang San Miguel Holdings Corp. na nakakuha ng 78.33 porsyento ng shares. Ang shares naman ng HCPTI ay naging 15.16 porsyento na lamang.
Nalaman ng HCPTI ang planong pagpapalaki ng capital stock at tinangka nila itong harangin at sumulat sila kay Sales pero hindi umano inaksyunan ang kanilang sulat.
“Verily, as a result of such failure to timely act on our request, respondent (Sales) gave Michael and the rest of his cohorts, MNHPI, Petron and now the latter’s affiliate, SMHC, ample opportunity to increase the shareholdings in MNHPI, to the prejudice of HCPTI,” saad ng reklamo.
Hindi umano mangyayari ang pagtataas ng shares ng hindi dumadaan sa tanggapan ni Sales. Hindi umano dapat pinayagan ang pagpapalaki ng shares dahil sa intra-corporate dispute.
“Having clearly violated Section 5(a) of RA No. 6713, respondent must also be held administratively liable and must be dismissed from service, and pending investigation, must be preventively suspended,” saad ng reklamo.
May paglabag din umano si Sales sa grave misconduct, gross neglect of duty, at incompetence in the performance of his official duties.
Si Rep. Romero ay nahaharap sa kasong qualified theft at hindi pinayagan na magpiyansa. Nagpalabas na ang warrant of arrest ang Manila Court laban sa kanya.