WELCOMe PI or Wow PI. Mao na ni ang mahimong bag-ong slogan sa tourismo nato ingon ni Senator Richard Gordon niadtong Lunes samtang nag-hearing bahin sa mga extrajudicial killing kun dili mag-usab si Presidente Duterte ug dili moundang ug pamalikas.
Sa mga karaan nga history books ang PI abbreviation o minubo para sa Philippine Islands pero sa gisulti ni Gordon, ang PI minubo kini sa “p . . .ng ina” nga morag paborito nga balikas ni Presidente.
Pastilan! Sakit baya sa dunggan ang pirmi makadungog ug pamalikas.
Niadtong panahon sa kampanya, na-isyu ang pagpamalikas ni Presidente labi na paghuman niya gi-PI si Pope Francis. Miingon ang iyang mga defenders, naandan niya mag-PI kay parte ni sa Mindanao o Bisaya culture.
Tanan tawo man siguro dunay pamalikas pero dili sakto nga ang pag-PI parte sa kultura natong mga taga-Mindanao ug mga Bisaya, labi na kun nagasulti ta sa publiko ug isip usa ka halangdon nga tawo.
Sa literal nga pagkasulti, dili baya PI ang kumon nga pamalikas sa mga Bisaya (sama sa piste, leche, giatay, amaw, yawa). Ang PI balikas na sa mga Tagalog.
Pero dili isyu kun Bisaya o Tagalog ang PI. Ang importante basi sa gisulti ni Gordon, maundang ang pag-PI ni Presidente, kay dili angay sa iyang posisyon.
Ingon ni Gordon, “the President must not be heard saying bad words” and he “has the duty to be a statesman.”
Mismo mga kaalyado ni Presidente ang gasulti nga unta maghilom na lang siya ug magtrabaho na lang.
Ang advise ni House Majority leader Rodolfo Fariñas, dili na mosulti si Presidente “until he could adjust to refinement required of statemen.”
Mora sila ug nagkinto samtang ilang gihatag ang ilang tambag kay basin ug ma-blasted o mabuthan sa kasuko ni Presidente ug makatilaw ug PI.
Pastilan! Di ba si Presidente mismo ang miingon nga mag-usab siya ug dili na mamalikas pagtungtong niya sa puesto isip presidente?
Pila ka semana una ang iyang inauguration, misaad si Presidente ug ”metamorphosis” atubangan sa mga magbabalita sa usa ka press conference sa Davao City niadtong Hunyo 2.
Ingon siya: “I’m really a rude person. I’m enjoying my time as a rude person. I am not yet President.”
Ang iyang saad: “But when I become President, when I take my oath of office, if you want, I can be more in keeping with the dignity of the office. I will tone down my cursing. That will be past. It’s gonna be history.”
Hapit na ang 100 days nga siya ang presidente, pero di pa makita ang iyang metamorphosis ug pagbag-o.
Taas na ang listahan sa iyang na-insulto ug na-PI. Lakip sa lista sila Senator Leila De Lima, US President Barack Obama, UN Secretary Ban Ki-moon ug ang European Union. Kadaghanan nakatilaw ug PI kay nagpadayag sa ilang kabalaka sa gitawag ug extrajudicial killings sa iyang giyera batok sa druga.
Dunay usa ka isog nga nag-post sa FB: Ngano man motuo ta sa gisaad nga change is coming kun mismo si Presidente dili makausab sa iyang kaugalingon ug motuman sa iyang saad?
Pastilan! Kai-sog nga ma-PI.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.