No. 2 spot tatangkaing masolo ng Perpetual Help Altas

Mga Laro Ngayon
(The Arena)
2 p.m. EAC vs St. Benilde
4 p.m. Mapua vs Perpetual
Team Standings: San Beda (7-0); Perpetual Help (6-2); Arellano (6-2); Letran (5-2); Mapua (5-2); JRU (3-4); Lyceum (3-5); EAC (2-6); San Sebastian (1-7); St. Benilde (0-8)

PILIT tatapusin ng University of Perpetual Help Altas ang kampanya nito sa unang round sa ikalawang puwesto sa pagsagupa sa Mapua Cardinals at Season 91 Most Valuable Player Allwell Oraeme sa 92nd NCAA men’s basketball tournament sa The Arena sa San Juan City.

Ang Altas ang ikalawang pinakamainit na koponan matapos magtala ng apat na sunod na panalo kabilang ang 70-53 panalo kontra Emilio Aguinaldo College Generals noong Martes na nagtulak sa Las Piñas-based university sa pagsalo sa ikalawang puwesto kasama ang Arellano University Chiefs na may 6-2 panalo-talong kartada.

Posibleng masolo ng Altas ang ikalawang puwesto kung mabibigo ang Cardinals, na kasalukuyang nasa ikaapat na silya kasama ang nagtatanggol na kampeong Letran Knights na may 5-2 panalo-talong karta, sa kanilang alas-4 ng hapon na laban.

“Kaunting panahon lang ang paghahanda namin,” sabi ni Perpetual Help coach Jimwell Gican. “Kailangan namin na maglatag ng matinding depensa kung gusto namin manalo.”

Tampok sa bakbakan ng Perpetual Help at Mapua ang pinakaaabangan na paghaharap ng mga Nigerian na si Bright Akhuetie at Oraeme, na tinanghal noong nakaraang taon na Rookie of the Year at MVP.

Nagtatala si Akhuetie ng 18 puntos, 12 rebounds at 2.0 blocks kada laro habang si Oraeme ay may average na 17.7 puntos, season-high 19.3 boards at 3.0 blocks sa pitong laro.