Petecio sibak agad sa AIBA World Women’s Boxing Championship

NAPATALSIK agad si Nesthy Petecio sa kontrobersyal nitong unang laban sa women’s flyweight kontra kay Zohra Ez Zahraoui ng Mauritius sa 2016 AIBA World Women’s Boxing Championship sa Barys Arena sa Astana, Kazakhstan.

Patas ang iskor sa una at ikalawang round sa 38-38 habang nakuha ng sixth seed na 2014 AIBA World Women’s Boxing Championship silver medalist na si Petecio ang ikatlong round, 40-35.

Gayunman, ibinigay ng mga hurado na sina Veronika Szucs ng Hungary, Martin Tadic ng Croatia, Moise Mbemap ng Australia, Armando Villa ng Venezuela at Thomas Riebe ng Germany ang panalo kay Zahraoui na pinagbasehan ang first at second round upang mapatalsik si Petecio sa nakuhang 1-2 round.

Dahil sa kabiguan ay agad naglaho ang tsansa ng Pilipinas sa isang silya sa 2016 Olympic Games na gaganapin sa Rio de Janeiro, Brazil sa Agosto 5-21 dahil tanging ang weight division lamang ni Petecio sa tatlong kategorya na lalahukan ng Pilipinas ang kasama sa mga pinaglalabanan para sa kada apat na taong torneo.

Tanging naging konsolasyon sa Pilipinas ang pagwawagi ni Singapore Southeast Asian Games champion at 2012 World Women’s Boxing Championship champion Josie Gabuco sa light flyweight division (45-48 kg) sa pag-uwi nito ng referee-stopped-contest sa ikalawang round para sa 2-0 panalo kontra kay
Sevda Asenova ng Bulgaria.

Pinaglalabanan lamang sa dibisyon ni Gabuco ang prestihiyo at gintong medalya dahil hindi kasali sa Rio Olympics ang kanyang kategorya gayundin ang bantamweight o 54 kg division na kinabibilangan ni Singapore SEA Games silver medalist Irish Magno na nabigo rin sa una nitong laban.

Nahugot ni Gabuco ang 39-35, 40-34 at 37-37 iskor mula sa limang hurado habang nalasap ni Magno ang isa pa rin na kontrobersyal na 0-3 kabiguan kontra kay Bolortuul Tumurkhuyag ng Mongolia matapos isagawa ang countback sa tatlong round dahil sa mga iskor na 38-38, 38-38 at 38-38.