Finals sweep tatangkain ng Rain or Shine Elasto Painters

Laro Ngayon
(Araneta Coliseum)
7 p.m. Alaska vs Rain or Shine
(Game 4, best-of-seven championship series)

MAKUMPLETO ang 4-0 sweep ang puntirya ng Rain or Shine Elasto Painters kontra Alaska Aces sa Game Four ng kanilang 2016 Oppo PBA Commissioner’s Cup best-of-seven championship series ngayon sa Smart Araneta Coliseum sa Cubao, Quezon City.

Ang salpukan ng Rain or Shine at Alaska ay gagawin dakong alas-7 ng gabi.

Bagamat nakuha ng kanyang koponan ang 3-0 bentahe sa kanilang best-of-seven championship series hindi naman nagkukumpiyansa si Rain or Shine head coach Joseller “Yeng” Guiao.

“We have a 3-0 lead, we have one foot inside the door, but again, it’s happened before and it can happen again,” sabi ni Guiao matapos na magwagi ang Elasto Painters sa Game Three, 112-108, at makubra ang 3-0 lead kontra Alaska noong Miyerkules ng gabi.

Ang tinutukoy naman ni Guiao ay ang pagbangon na ginawa ng San Miguel Beermen sa 2016 Philippine Cup Finals mula sa 0-3 paghahabol kontra Alaska ilang buwan na ang nakakalipas.

At ang makasaysayang pagbangon ng Beermen ang siyang ginamit na paalala ni Guiao sa kanyang koponan na hindi pa sila nakakasiguro sa kampeonato sa puntong ito.

“SMB was 0-3 when they won a championship. That’s what’s on our mind. We don’t want to be in that position. We will do all we can to finish this on Friday,” sabi pa ni Guiao.

At ang pagbangon mula sa 0-3 paghahabol ang susubukang gawin ngayong gabi ng Alaska kontra Rain or Shine.

“We better have some San Miguel so we could make a “beer-acle” happen, I guess,” sabi ni Alaska head coach Alex Compton.

“But honestly, at this point, for me, it’s absolutely about pride. You don’t win, three games or four games on Friday,” dagdag pa ni Compton, na hangad ang koponan ay tumutok muna sa panalo sa Game Four. “And I tell you, maybe I’m old fashioned, maybe I’m wrong but I’m all about every possession, about every aspect of every possession.”