Trudeau hindi pa nakakausap ni PNoy matapos ang pagpugot sa Canadian national?

IPINAG-UTOS kahapon ni Pangulong Aquino sa Armed Forces of the Philippines (AFP) at Philippine National Police (PNP) na tiyak na mapapanagot ang bandidong Abu Sayyaf matapos naman ang pagpugot sa bihag na Canadian national noong Lunes.

Inamin naman ni Presidential Communications Operations Office (PCOO) head Secretary Herminio “Sonny” Coloma na hindi niya batid kung nakausap na ni Aquino si Canadian Prime Minister Justin Trudeau kaugnay ng pagpugot kay John Ridsdel.

“The President has directed the security forces to apply the full force of the law to bring these criminals to justice,” sabi ni Coloma.

Idinagdag ni Coloma na simula noong isang linggo nakikipag-ugnayan na si Foreign Affairs Secretary Jose Rene Almendras sa Canadian foreign ministry at ang embassy nito kaugnay naman ng ultimatum na ibinigay ng Abu Sayyaf na nagtapos noong Lunes.

“We extend our deepest sympathy and condolences to the Canadian government and to the family of Mr. John Ridsdel who died in the hands of the ASG bandits,” dagdag ni Coloma.

Si Ridsdel ay isa sa dalawang Canadian national na dinukot ng Abu Sayyaf kasama ang isang Norwegian national at isang Pinay sa Samal Island, Davao Del Norte noong Setyembre 2015.

“There will be no let-up in the resolute efforts of the joint PNP-AFP task group in pursuing intensive and wide-ranging military and law enforcement operations to neutralize these lawless elements and thwart further threats to peace and security,” ayon pa kay Coloma.

Humingi ang Abu Sayyaf ng tig-P300 milyong ransom kapalit ng kalayaan ng dalawang Canadian national.

Nagdesisyon naman si Aquino na ikansela ang nakatakdang pangangampanya sa Dipolog kahapon para magmonitor ng patuloy na operasyon ng militar laban sa Abu Sayyaf.

Kinondena na ni Trudeau ang pagpugot sa kanyang kababayan.

Matatandaang kasama si Trudeau sa mga bumisitang mga lider noong Nobyembre 2015 para dumalo sa Asia Pacific Economic Conference (APEC) na ginanap sa Pilipinas.