Xian ibinigay ang b-day gift kay Kim sa Singapore

XIAN LIM AT KIM CHIU

SA April 19, Tuesday, ise-celebrate ni Kim Chiu ang kanyang 26th birthday at para sa kanya, ang matagumpay niyang first major concert sa KIA Theater nitong nakaraang weekend ang “best gift” na natanggap niya.

“Isa na ‘to sa napakagandang regalo ho para sa akin. Para lang umupo at magbayad ng ticket, nako mahal po ‘yung ticket ko. Nagpapasalamat ako na napuno ko siya (KIA Theater) so regalo na nila ‘yun para sa akin,” sey ni Kim.

Dagdag pa ng dalaga, na-realize niya na hindi pala talaga biro ang magkaroon ng solo concert kaya mas tumaas daw ang respeto niya sa mga concert artists na palaging may bonggang show sa malalaking venue.

Nang tanungin ang dalaga kung meron nang regalo sa kanya ang rumored boyfriend niyang si Xian Lim, meron na raw. Ipinasyal daw siya ng binata sa Hongkong.

“Nakakatuwa kasi first time kong pumunta sa mga art exhibits, inikot niya ko doon. Tapos nag-ikot ikot kami. Ang saya lang ng experience,” chika pa ng dalaga.

Sa isang Instagram photo na ipinost ni Kim, makikita ang sweet bonding moments ng magka-loveteam. Nilagyan pa niya ito ng caption na: “#ArtCentral #ArtBasel #GagosianGallery sakit lang sa paa kakalakad but… Lovin’Art!! thanks @xianlimm!”

Samantala, isa pang magandang birthday gift na ikino-consider ni Kim ay ang patuloy na pagtaas ng rating ng kanilang Primetime Bida series ni Xian na The Story Of Us.

Puro magagandang komento raw ang natatanggap nila tungkol sa kanilang serye, lalo na sa akting nila at pakikipagsabayan sa mga veteran stars ng programa. Sey ng dalaga, mas ginanahan pa silang magtrabaho ni Xian dahil sa mga papuring tinatanggap nila.

“Sobra po akong nao-overwhelm sa lahat-lahat po ng nangyayari sa akin ngayon. Sobra po akong masaya, wala na po akong mahihiling pa sa birthday ko, sapat-sapat na po,” pahayag pa ng Kapamilya singer-actress at ngayon ay concert artist na rin.

Sa pagpapatuloy naman ng The Story Of Us sa Primetime Bida, asahan ang mas marami pang rebelasyon sa relasyon at mga karakter nina Tin at Macoy (Kim at Xian) pati na rin ang mga bagong mukha sa kuwento na magiging bahagi ng buhay ng dalawang pangunahing karakter sa serye.

Kasama pa rin sa The Story Of Us sina Zsa Zsa Padilla, Aiko Melendez, Princess Punzalan, Janus del Prado, Rodjun Cruz, Cheena Crab, Bryan Santos at marami pang iba, sa direksiyon nina Richard Somes at Will Fredo.