Franz Pumaren hangad bigyan ng UAAP title ang Adamson Falcons

BIGYANG muli ng kampeonato ang Adamson University Soaring Falcons ang hangad ni five-time UAAP men’s basketball champion coach Franz Pumaren matapos na pormal na ianunsyo kahapon ng pamunuan ng Adamson University ang pagtalaga sa kanya bilang bagong head coach ng koponan.

“It’s an honor and a great opportunity for us. We don’t run away from challenges. We’ll make sure that each year we’re going to be very competitive. I’m here and we’re not a hypocrite, we’re here to give Adamson a championship,” sabi ni Pumaren, na hinatid sa apat na diretsong kampeonato sa UAAP men’s basketball ang De La Salle University Green Archers mula 1998 hanggang 2001 bago nakuha ang huling titulo sa koponan noong 2007, sa press conference na ginanap sa CS Building ng Adamson University.

“With the full backing of the Adamson family and management I think we will be there always fighting for the school. so it’s gonna be an exciting Adamson team come next year,” sabi pa ni Pumaren.

“We are putting our full trust in Franz (Pumaren),” sabi Fr. Gregorio Bañaga Jr., CM, ang outgoing president ng Adamson University. “While we do not expect an instant transformation, we are optimistic that he and the coaching staff will build us back to become a highly competitive team in the coming seasons to live up to its name, the Soaring Falcons.”

Sakto naman ang pagtalaga kay Pumaren sa nasabing puwesto dahil nagsasagawa ang Adamson ng pagbabago sa kanilang basketball program para maiangat ang paglalaro ng koponan.

Kaya naman hangad ng Adamson, na huling nagkampeon sa men’s basketball noong 1977, na sa pagkuha kay Pumaren ay magagabayan nito ang koponan para muling maging palaban sa liga.

Maliban kay Pumaren ipinakilala rin kahapon ang coaching staff ng Adamson na kinabibilangan ng mga assistant coaches na sina Mike Fermin, Don Allado, Renren Ritualo at Jack Santiago.