Nasawi ang isang pulis at barangay tanod matapos pagbabarilin habang rumeresponde sa isang kaguluhan sa isang videoke house sa Monkayo, Compostela Valley, kahapon (Miyerkules) ng umaga.
Dead on the spot sina PO1 Abdulkhan Sawadjaan Sailama, nakatalaga sa Mt. Diwata Special Sub-Police Station, at Allan Alegarbes, residente at tanod ng Brgy. Mt. Diwata, sabi ni Supt. Antonio Rivera, tagapagsalita ng Southern Mindanao regional police.
Naganap ang insidente dakong alas-4 sa Balite Videoke house sa Purok 1-A, Brgy. Mt. Diwata.
Bago ito, nakatanggap ang mga lokal na awtoridad na may nagaganap na “komosyon” sa videoke bar, kaya rumesponde sina Sailama at Alegarbes, ani Rivera.
Nang dumating ang dalawa, bumunot ng baril ang isang “John” at pinagbabaril ang pulis at tanod.
Matapos iyo’y kinuha pa ng salarin ang service firearm ni Sailama, bago tumakas, ani Rivera.
Pinaghahanap pa ng lokal na pulisya ang salarin habang isinusulat ang istoryang ito.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.