Gilas Pilipinas asinta ang semifinals kontra Lebanon

Laro Ngayon
(Changsha Social Work College Gym)
9:30 p.m. Gilas Pilipinas vs Lebanon

MATAPOS na maisakatuparan ang hangaring manguna sa Group E sa pagtatapos ng group preliminary rounds noong Martes, tatangkain ngayong gabi ng Gilas Pilipinas na umusad sa semifinals sa pagsagupa sa Lebanon sa 2015 FIBA Asia Men’s Championship quarterfinals sa larong gaganapin sa Changsha Social Work College Gym sa Changsha City, China.

Nagawang makuha ng Pilipinas ang No. 1 spot sa Group E matapos walisin ang lahat ng mga laro nito sa second round kabilang ang nakakagulat na 87-73 panalo sa defending champion Iran noong Lunes para maikasa ang paghaharap nila ng Lebanon, ang No. 4 seed sa Group F, sa pagsisimula ngayon ng knockout stage ng torneo.

Patuloy na sasandalan ni Gilas Pilipinas coach Tab Baldwin sina naturalized player Andray Blatche, Jason Castro, Terrence Romeo, Ranidel de Ocampo at Calvin Abueva para pangunahan ang koponan na manggagaling sa 99-65 pagwawagi kontra India noong Martes.

Si Lebanon coach Veselin Metic ay aasahan naman sina Jasmon Jovan Youngblood, Mohamad Ali Haidar, Ahmad Ibrahim, Amir Saoud at Wael Arakji para pamunuan ang koponan na magmumula naman sa 80-76 panalo sa Jordan nito ring Martes.

Ang magwawagi sa pagitan ng Pilipinas at Lebanon ay makakasagupa ang mananalo sa pagitan ng Qatar at Japan sa semifinals bukas.

Ang magkakampeon sa FIBA Asia Championship ang makakakuha ng natatanging silya sa 2016 Rio Summer Olympics.