Derek bibida sa life story ng pinatay na car racer; champion din sa frisbee

ANG saya-saya raw ng mag-inang Mother Lily Monteverde at Roselle Monteverde-Teo dahil kumikita ang latest movie nilang “The Escort” na nagbukas last Wednesday.

Ang “The Escort” ay sa direksiyon ni Enzo Williams at pinagbibidahan nina Derek Ramsay, Lovi Poe at Christopher de Leon na nagdagdag pa raw ng sinehan kamakalawa.

Naniniwala kaming kumita ito dahil palabas sa dalawang sinehan sa Gateway Mall noong dumaan kami at halos lahat ng sinehan sa Metro Manila ay may “The Escort”.

Kaya lang sa Robinson’s Magnolia at Eastwood Mall ay may kahati sa oras ng screening ang Regal movie dahil marami pa ring nanonood ng “Doctor Strange.”

Sa nakaraang solo presscon ni Derek para sa “The Escort” ay sinabi nitong hanggang 2018 pa ang kontrata niya sa TV5, bagama’t pinapayagan siyang mag-guest sa ibang TV networks pero bawal naman siyang mawala ng bansa ng matagal.

May Frisbee competition sanang sasalihan si Derek sa Amerika at tatlo hanggang apat na buwan sana siyang mawawala, “Sayang nga, eh, hindi ako pinayagan ng Singko, I was asked to play professionally in the US, hindi ako pinayang mawala ng three to four months,” sabi ng aktor.

Kamakailan lang ay nag-champion ang Frisbee team ni Derek sa Hongkong, “I was the number one highest scorer in the world, our team finished 6th in the world, but I got the highest score in the world and then it’s first for a Filipino (na nakakuha ng mataas na score).

“We competed in Hongkong last week, nanalo kami at five years straight nanalo and two weeks before that, nanalo kami sa Taiwan. Kung kailan gusto ko na talagang mag-retire, saka naman maraming imbitasyon. Sa November, mayroon akong laban dito sa Pilipinas and 60 teams from all over the world,” sabi ng aktor.

Ang daming medalyang nakukuha ng larong Frisbee sa bansa pero bakit kulang ito sa exposure o suporta ng gobyerno? “It would be nice if the government will give us some sort of recognition, but that’s not what I do it for, I’m proud to represent the country when I put a uniform that bares the colors of our flag, lahat ng sakit ng katawan mo, walang bayad ‘yan, it’s the best feeling. For me, as an athlete, highest level ‘yan,” katwiran ni Derek.

Samantala, hindi lang sa Frisbee mahusay si Derek dahil karerista rin pala siya at nakatakda niyang gawin ang “The Enzo Pastor Story” na kilalang car racer na pinatay noong June 12, 2014.

Si Derek ang personal choice ni direk Enzo Williams para sa papel ng kilalang car racer. At tingin naman namin ay bagay na bagay sa aktor ang role.