Mark Bautista marespeto sa magulang kaya pinagpapala

Isa si Mark Bautista sa mga hosts ng bagong talent search ng TV5, ang Born To Be A Star na napapanood tuwing Sabado at Linggo nang gabi, nakakatuwang balikan ang karera ng magaling na singer-actor.

Nu’ng mag-audition si Mark para sa Star For A Night kung saan sila naglaban-laban nina Sarah Geronimo at Angeline Quinto ay nakisakay lang siya sa isang cargo ship papunta sa Maynila mula sa Cagayan de Oro City.

Napanood namin ang grand finals ng talent search, may kabaduyan pa ang itsura at porma nu’n ng binatang singer, si Sarah Geronimo ang nagkampeon. Pero ngayon ay isa na siya sa mga hosts ng isang labanan, magandang alalahanin ang kanyang nakaraan nang dahil sa Born To Be A Star, ang dating kalahok lang ay sikat nang singer-actor ngayon.

Saludo kami kay Mark sa pagiging marespeto sa kanyang mga magulang, suportado rin ni Mark ang kanyang mga kapatid, hindi pinagbago ng popularidad ang magandang pagpapalaki sa kanya.

Nu’ng magkasama kami sa Amerika para sa isang show ay nasaksihan namin ang pagiging marespeto ni Mark sa kanyang ama.  Hindi nawawala sa kanyang bokabularyo ang po at opo, inaasikaso niya ang kanyang magulang kahit saan, kaya naman lalo pa siyang pinagpapala.

Ang contestant nu’n ay host na ngayon, may karapatan siyang magbigay ng payo sa mga kalahok, dahil pinagdaanan ‘yun ni Mark Bautista bago siya magkaroon ng magandang kapalaran sa mundo ng musika.
Born to be a star si Mark Bautista.