Bela Padilla: Na-shock ako, si Coco Martin ang katambal ko!

In fairness, kahit kami ay nagulat nang ihayag ng Dreamscape Entertainment TV na isa si Bela Padilla sa magiging ka-loveteam ni Coco Martin sa TV remake ng 1997 classic FPJ movie na “Ang Probinsiyano”.

Wala kasi kaming nabalitaan na lalayasan na ni Bela ang GMA 7 at magbabalik na nga bilang Kapamilya. Nakilala noon sa ABS-CBN si Bela bilang si Krista Valle na naging bahagi ng Star Magic batch 15.

Pero naging Bela Padilla ang kanyang screen name nang lumipat sa GMA 7 noong 2010.”Medyo alam ko na lilipat talaga ako kaso may movie so medyo na-stop sandali, hindi ako nakalipat kaagad,” paliwanag ng dating Kapuso actress.

Pero sabi ni Bela, kahit daw siya ay nagulat nang i-offer sa kanya ng Dreamscape ang seryeng Ang Probinsiyano at mas lalo siyang na-excite nang malamang si Coco ang makakatambal niya.

“Nu’ng sinabi sa akin na ito ang una kong project, medyo nagulat ako. Kasi nu’ng alam kong lilipat ako, lagi naming dyino-joke paano kung ang unang soap ang ibigay sa iyo si Coco ang kasama mo.

So laging joke ‘yon tapos lagi ako, ‘Hindi, hindi totoo ‘yan.’ So parang what an honor na my first show in ABS-CBN is with Coco Martin,” ani Bela.

Dagdag pa ng dalaga, “I think things just fell into place. I’d been waiting for this to happen. Now it’s finally here. I’m excited to work.”

Pangako naman ni Coco na gaganap bilang pulis, “Hinding-hindi ko bibiguin ang kapulisan, ang ABS-CBN, sila Ma’am Charo (Santos-Concio). Gagawin ko po ang best ko para magampanan ko ng tama itong proyekto na ito.”

Makakasama rin sa Ang Probinsiyano sina Angeline Quinto, Albert Martinez, Arjo Atayde, Jaime Fabregas at ang biyuda ni Fernando Poe, Jr. na si Ms. Susan Roces, sa direksiyon nina Malu Sevilla at Avel Sunpongco.