Operasyon sa puso ni Rico J tumagal ng 7 oras

Umabot ng pitong oras ang isinagawang heart surgery sa veteran singer-comedian na si Rico J. Puno noong Linggo. Matagumpay na naoperahan sa puso si Rico J kaya naman abot-langit ang pasasalamat ng kanyang pamilya.

Ayon sa kaibigan ni Rico na si Richard Merck na siyang nagbibigay ng updates sa mga kaibigan nila sa showbiz at sa media, nagpapagaling na ngayon ang singer matapos ang operasyon.

“God is great! I am so grateful to you my dear God! After more than seven hours in the operating room, our Dear Rico J survived the operation,” ayon kay Richard.

Dugtong pa nito, “Let’s celebrate Rico J’s new gift of life! We love you Rico! I guess you made God laugh in some of your shows! He loves you so much Pre! Stay happy and healthy! Amen to what God gave you today!”

Bago ang isinagawang operasyon, sumailalim muna sa angiogram si Rico J at nakita ngang meron siyang clogged aorta. Ilang medical tests pa ang ginawa ng doktor sa kanya bago ituloy ang bypass surgery.

Nagpasalamat naman ang pamilya ng beteranong singer, lalo na ang kanyang partner na si Queenie sa lahat ng nagdasal para sa kaligtasan ni Rico J Puno.