Fans nina Kris at Juday rambulan na

Hindi lang nakasentro ngayon ang kontrobersiya kina Kris Aquino at Judy Ann Santos, pati ang kanilang mga tagasuporta ay nagrarambulan na rin, pero kung susumahin ay mas maraming humahanga sa katapangan at pagpapakatotoong ginawa ni Juday kesa sa pagtatanggol ni Kris sa kanyang kapatid na pangulo.

Kung ang kasalukuyang panahon ang gagawing barometro, kahit pusa lang ang ipanglaban kay Kris ay siguradong mananalo ‘yun kesa sa kanya, lutang na lutang pa kasi ang galit ng bayan sa kanyang kapatid dahil sa usapin ng SAF-44.

Walang panalo ngayon si Kris kahit pa umupa siya nang sangdamakmak na magtatanggol sa kanilang magkapatid. Magmimistulang sigaw ‘yun na walang nakakarinig.

Isang araw ay huhupa rin ang kontrobersiyang ito, lalamig na ang ulo ng ating mga kababayan habang ang iba ay mapapagod na lang, pero hindi pa ngayon mangyayari ‘yun.

Habang isa-isa pang ihinahatid sa kanilang huling hantungan ang apatnapu’t apat na sundalong parang mga manok na pinalaki at saka pinatay ay paulit-ulit na mabubuhay ang emosyon ng ating mga kababayan kontra kay P-Noy na hindi man lang nagbigay-respeto sa kanilang mga bangkay nang ilipad sila sa Maynila mula sa Maguindanao.

Hindi pa ngayon matutupad ang katahimikang hinihingi ni Kris Aquino at ng kanyang pamilya. Ang unang tanong na dapat nilang sagutin muna bago ang kapayapaan ng loob na hinahanap nila—saan at sino ang nagpasimuno ng lahat ng ito?