Babala kay Erich: Lalamunin ka nang buhay ni Kaye!

And talking about galing sa pag-arte, dapat ding harapin at tanggapin ni Erich Gonzales na isang malaking hamon sa kanyang pagkaaktres ang komento ng marami na lalamunin siya ni Kaye Abad sa bago nilang soap opera sa ABS-CBN, ang Two Wives.

Kilala nating isa sa pinakamahuhusay na character actress si Kaye ng kanyang henerasyon at kahit ngayon lang siya nabigyan uli ng serye kung saan siya talaga ang matatawag bida, naniniwala kaming deserving siya sa proyekto bilang ka-love triangle nina Erich at Jason Abalos, isa ring magaling na aktor.

Sa mga nababasa at naririnig kasi naming mga komento na nakapanood ng trailer ng Two Wives, mas marami ang nagsabi na si Kaye ang magdadala ng kuwento at sa mga eksenang nakita nila, tinalbugan daw agad nito si Erich, lalo na doon sa mga confrontation scenes nila.

“Mas dapat na ma-challenge si Erich, at mas ganahang sumabay sa galing nina Jason at Kaye dahil kung hindi magsa-suffer siya sa pagkukumpara sa galing ng mga kasama niya.

Kung magpapa-intimidate siya at magpapabaya, baka talagang malunod na siya sa husay nina Kaye at Jason,” hirit pa ng nakausap namin.

Nagsimula na kagabi ang Two Wives sa Primetime Bida ng ABS.