HINDI maitatatwa na marami ang nagtutulong-tulong para mailatag ng College of St. Benilde ang apat na sunod na panalo.
Ngunit kung may isang manlalaro na siyang pinagkukuhanan ng solidong kontribusyon, ito ay walang iba kundi si Mark Romero.
“He is our leader in this squad and we really need him to be at his best if we want to keep winning,” wika ni St. Benilde coach Gabby Velasco.
Matapos ang tatlong dikit na kabiguan, bumangon ang Blazers at ipinanalo ang sumunod na apat na laro para lumapag sa ikaapat na puwesto sa 4-3 baraha.
Sa linggong nagdaan, dalawang laro ang hinarap ng Blazers at hindi nila pinaporma ang four-time defending champion San Beda College Red Lions, 83-76, bago isinunod ang Lyceum of the Philippines University Pirates, 86-77.
Si Romero ay naghatid ng 17 puntos, 5.5 assists at 3 rebounds kada laro para makuha ng 6-foot-2 player ang ACCEL Quantum/3XVI NCAA Press Corps Player of the Week award na suportado rin ng Mighty Mom anti-bacteria dishwashing liquid, Dr. J rubbing alcohol at Bactigel hand sanitizer.
Ang mga kakampi na sina Jonathan Grey at Paolo Taha ay gumana rin at ikinonsidera rin sa lingguhang parangal pero sa huli, ang intensidad sa laro ang siyang naihawa ni Romero sa mga kasamahan.
“As one of the leaders of this team, I have to really step up and show my teammates that we really have to work harder in order for us to get good results,” tugon ni Romero.
Sina Jaycee Asuncion at Michael Mabulac ng Jose Rizal University Heavy Bombers ang iba pang inilagay na palaban sa parangal matapos manalo rin sa mga hinarap na asignatura laban sa University of Perpetual Help Altas (62-61) at Arellano University Chiefs (99-98) sa triple overtime.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.