Ngayong ala una y medya nang hapon ay pakiabangan sa Paparazzi Showbiz Exposed ang mga pasabog ni Iwa Moto.
Mula nang magkahiwalay sila ng kanyang non-showbiz boyfriend na si Mickey Ablan ay ngayon lang nagbukas ng puso ang nakilala bilang iskandalosang young sexy actress.
Kung paniniwalaan natin nang isandaang porsiyento ang lahat ng rebelasyon ni Iwa ay kakikitaan natin ng katwiran ang mga nakaraang iskandalong kinasangkutan niya nang dahil sa pag-ibig.
Mas maiintindihan din natin kung ano ang kinasadlakan ng buhay niya kay Mickey, kung bakit siya tinatalo ng kanyang emosyon, kaliwa’t kanan naman pala kasi ang babae ng lalaking ‘yun?
At naging malaking rebelasyon din para sa amin ang ginawang paghahabol sa kanya noon ng lalaki kahit pa ilang buwan nang nagdadalantao si Janna Dominguez, sagot lang daw niya ang hinihintay ni Mickey, at agad na nitong iiwan si Janna.
Sa aming panayam kay Iwa ay napakarami naming nadiskubre tungkol sa kanyang pagkatao.
Tatlong taong gulang lang siya nang iwan sila ng kanyang ama, dose anyos na siya nang muli silang magkita, at pagkatapos nu’n ay parang bula na uling nawala ang kanyang amang Hapon.
Nang sa wakas ay magkita sila uli ay maysakit na ang kanyang tatay, nakakulong ito nang magkita sila sa Japan, nailabas nila ito sa kulungan pero hindi na sila nabigyan ng pagkakataong makabawi sa maraming taong ipinaghiwalay nila dahil sa namatay ito agad.
Anak pala ng Yakuza si Iwa Moto, pero wala raw putol na daliri ang kanyang tatay, ibig sabihi’y opisyal ng grupo ang kanyang ama at hindi patakbuhing miyembro lang.
Mamayang hapon ay matitinding rebelasyon ang isisiwalat ni Iwa Moto, mga senaryo ‘yun na ngayon lang niya ipagtatapat sa publiko, hindi ikatutuwa nina Mickey Abalan at Janna Dominguez ang pagtatapat ni Iwa Moto.
Magkita-kita po tayo mamaya sa Paparazzi Showbiz Exposed, ala una y medya nang hapon sa patuloy na sumisirit paitaas na network, ang TV5.
Ano-ano naman kaya ang mga nakahandang pasabog nina Zoren Legaspi, Dolly Ann Carvajal at Ruffa Gutierrez? Siguradong meron.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.