Bukod sa mansyon, Coco may sarili na ring farm

Walang Coco Martin ngayon kung walang Ihman Esturco na nakadiskubre sa kanya nu’ng katorse anyos pa lang ang magaling na aktor. Payat na payat pa nu’n si Dengdeng na pinsang-buo naman ng kaibigan ni Ihman, gusto nang mag-artista nu’n ng guwapong si Coco Martin.

“Pero dahil fourteen years old pa lang siya, sinabihan ko siya na maghintay muna siya ng right time. Patpatin pa kasi siya, batambata pa ang itsura, pero sabi ko, kung habang naghihintay siya, e, may mga dumating na opportunity sa entablado, grab it!” kuwento ni Ihman na nagtatrabaho-naninirahan na ngayon sa Arizona, USA.

Malayong-malayo na nga ang nararating ni Coco na kinuha pala ni Ihman ang pangalan sa kumbinasyong Coco Lee at Ricky Martin, mayaman na rin ang magaling na aktor, marunong siyang humawak ng pananalapi.

Sa Casa Milan kung saan siya nakabili ng lote para patayuan ng kanyang dream house ay malaking atraksiyon ang lugar ng aktor. Nabili na rin kasi niya ang iba pang mga loteng kadikit ng kanyang bahay, meron pa siyang maliit na farm du’n ngayon, dahil vegetarian si Coco.

“Hindi maramot si Dengdeng, iniayos niya ang buhay ng pamilya niya, mahal na mahal niya ang lola niya, talagang hindi niya sinarili lang ang kung anumang meron siya ngayon.

“Matindi ang pinagdaanan niyang hirap, nagtrabaho pa siya sa Vancouver, tagalinis ng bahay ng mga Canadian, maraming-marami siyang pinaghuhugutan kaya ganyan siya kagaling na artista ngayon,” kuwento uli ni Ihman.

Gusto sana naming talakayin ang kuwento tungkol sa sinasabing anak nila ni Katherine Luna, pero huwag na lang, gusto naming respetuhin ang walang muwang na si Nicole na nakakaladkad sa usaping ito.

Ang masasabi lang namin ay maganda ang puso ni Coco Martin. ‘Yun lang.