#SerbisyoBandera: QC binuksan na ang ikalawang dialysis center

MAS malawak na ang access ng mga residente ng Quezon City na may chronic kidney disease (CKD) na nais magpa-dialysis treatment.

Bukas na kasi ang ikalawang dialysis center ng lungsod sa Rosario Maclang Bautista General Hospital (RMBGH).

“Chronic kidney disease is a growing public concern in the country. We hope that by opening this dialysis center and bringing our healthcare services closer to our people, no resident will have to choose between their well-being and their livelihood,” pahayag ni Mayor Joy Belmonte.

Batay sa datos ng Department of Health (DOH) at Philippine Renal Disease Registry, mahigit 40,000 Pilipino ang kailangang magpa-dialysis bawat taon. 

Baka Bet Mo: WATCH, NOW NA: ‘Bahay Modernismo’ bagong heritage house museum sa QC

Noong 2024 lamang, 42 ang naitalang namatay dahil sa CKD sa Quezon City. 

Layunin ng bagong pasilidad na mapababa ang bilang na ito sa pamamagitan ng mas abot-kayang dialysis treatment.

Ang RMBGH Dialysis Center ay itinayo gamit ang P8.5 million na budget mula kay District 2 Congressman Ralph Tulfo. 

Ang pondo ay ginamit para bumili ng mga kagamitan at ayusin ang pasilidad upang umayon sa standards ng dialysis services.

Bukas ang center mula Lunes hanggang Sabado at kayang magserbisyo ng hanggang siyam na pasyente kada araw. 

Ang bawat session ay tumatagal ng humigit-kumulang limang oras, kaya’t nasa 54 na pasyente ang maaaring matulungan kada linggo.

“Instead of enduring long waiting times in state hospitals or spending large amounts in private facilities, QCitizens now have access to quality dialysis treatment that is closer to home,” dagdag ni Mayor Belmonte.

Libre ang serbisyo para sa mga kwalipikadong pasyente sa ilalim ng pinalawak na PhilHealth Dialysis Package na malaking ginhawa para sa gastusin ng pamilya.

Upang makapagpa-dialysis, kailangang magsumite ng mga dokumento tulad ng endorsement mula sa nephrologist, Hepa profile na valid sa loob ng anim na buwan, huling tatlong treatment sheets, laboratory results, listahan ng gamot, clinical abstract, vaccination record, at PhilHealth ID number.

Ang RMBGH ang ikalawang dialysis center ng lungsod, habang ang una ay matatagpuan sa Quezon City General Hospital na may limang hemodialysis machines—tatlo para sa regular na dialysis, isa para sa emergency, at isa para sa mga pasyenteng may nakahahawang sakit.