Jellie Aw at Jam Ignacio
KASABAY ng pagso-sorry ni Jam Ignacio on national TV, may ipinost ang kanyang fiancée na si Jellie Aw sa social media tungkol sa mga babaeng may trauma na sa pakikipagrelasyon.
Ang feeling ng mga netizens, ito ang sagot ng content creator at DJ sa paghingi ng tawad ni Jam matapos siyang bugbugin sa loob ng kanilang sasakyan nitong nagdaang linggo.
Sa kanyang Facebook page, ibinahagi ni Jellie ang isang post ng isang netizen na may koneksyon sa mga kababaihang nagkaroon ng bad experience in life, partikular na sa kanilang mga past dyowa.
Tila ito rin ang nararamdaman niya ngayon matapos ang ginawang pananakit umano sa kanya ni Jam na humantong pa sa pagsasampa niya ng kaukulang kaso sa National Bureau of Investigation (NBI).
Baka Bet Mo: Jam Ignacio nagtatago na nga ba matapos kasuhan ni Jellie Aw sa NBI?
Mababasa sa title ng nasabing FB post, “PAANO MAG HANDLE SA BABAENG GALING NA SA FAILED RELATIONSHIP AT TRAUMATIZED NA?”
“Mahirap kasi kailangan mong habaan ang pasensya mo kasi hindi na siya ganoon ka bilis mag tiwala, at kailangan mo siya bigyan ng rason para pagkatiwalaan ka lang.
“Nawala na sa kanya yung sense kung paano nga ba talaga tratuhin ng tama, pero sobrang worth it kapag nakuha mo tiwala niya kasi endless siya magbigay ng pagmamahal sa lalaki,” ang simulang bahagi ng post.
Nagbigay din siya ng advice sa lahat ng kalalakihan para mas maintindihan ang feelings ng kanilang mga partner, lalo na yung may mga trauma na sa love.
Patuloy pa ng netizen, “Pag galit siya kailangan mo lang ng bigyan mo siya ng time para huminga at mag heal , higit sa lahat wag mo siyang pabayaan dahil traumatize na siya sa mga ganyang eksena, ayaw niya maranasan ulit na pabayaan or hahayaan lang siya habang nasasaktan.
“A history of trauma can cause us to excuse and ignore mistreatment, kapag naramdaman niya na parang mauulit yung sakit na naranasan niya iiyak yan ng malala at lalayo agad sa’yo.
“Itutulak kapa kahit kailangan na kailangan ka niya, just don’t let her suffer the same pain again kasi hindi madali yung trauma,” ang buong pahayag ng FB user.
Kagabi, nag-sorry nga si Jam Ignacio kay Jellie Aw at pinagsisisihan na raw niya ang nagawa niyang pananakit kasabay ng paghingi niya ng tawad sa pamilya at lahat ng taong nagmamahal sa content creator at DJ.
Sa panayam ng GMA kay Jam, nagpahiwatig ito na gusto pa rin daw niyang matuloy ang pagpapakasal nila ng kanyang girlfriend.
Itinanggi rin niya ang balitang nagtatago na siya ngayon sa mga otoridad matapos ang ginawa niyang pambubugbog kay Jellie.
Aniya, naghihintay lang siya ng tamang pagkakataon para harapin ang kasong isinampa sa kanya ni Jellie sa National Bureau of Investigation (NBI).
“Sa mga kapatid, sa mga kaibigan, heto, heto ako, haharap sa inyo, humaharap na humihingi ng taos-pusong sorry, sorry, sobrang sorry lalo na sa family ni Jellie, Ma, sorry Ma.
“Alam niya na mahal na mahal ko si Jellie,” ang pahayag ng ex-partner ni Karla Estrada.
Sabi pa ni Jam, sana’y mabigyan pa siya ng chance na ayusin ang relasyon nila ni Jellie in private.
Pinapangarap pa rin daw niyang makasama habangbuhay ang DJ at bumuo ng sariling pamilya.