TULOY ba tuloy na ang pagpapalabas ng pelikulang “The Rapists of Pepsi Paloma” sa mga sinehan sa Pebrero 5 base sa post ni Direk Darryl Yap sa kanyang Facebook account.
Magkakaroon muna ng premiere night ang pelikula sa Pebrero 4 na siguradong dadaluhan ni Direk Darryl at ng cast members nito, sa pangunguna ng lead star na si Rhed Bustamante na gaganap bilang Pepsi Paloma.
Wala pa kaming nababalitaan kung nai-submit na ng movie company ni Direk Darryl na VinCentiments ang pelikula para ma-review ng Movie and Television Review and Classification Board (MTRCB) sa pamumuno ni Chairperson Lala Sotto-Antonio.
Tiyak na marami na ang nag-aabang kung ano ang ibibigay na rating ng MTRCB sa “The Rapists of Pepsi Paloma” at ano nga kaya ang magiging reaksyon ni Chairperson Lala sa naturang pelikula?
Baka Bet Mo: Igan sa Pepsi Paloma movie ni Darryl Yap: Malabong payagan ng MTRCB
Gusto naming isiping nagkaroon na ng internal na pag-uusap sa pagitan ng kampo nina Direk Darryl at Bossing Vic Sotto since pareho silang inisyuhan ng gag order sa kinakaharap nilang kaso kaugnay ng teaser ng “The Rapists of Pepsi Paloma.”
Mukhang nasusunod naman ng dalawang kampo ang gag order dahil wala kaming nababalitaang nagsalita sila sa publiko hinggil sa kaso. Sa kasalukuyan ay parehong tahimik ang magkabilang kampo.
Anyway, nauna na ring nabanggit ni Direk Darryl na kapag napanood ang “The Rapists of Pepsi Paloma” ay malalaman ang buong kuwento sa buhay ng yumaong sexy star na nakilala noong dekada 80.
Naglabas na rin ng trailer na naka-post din sa Facebook account ni Direk Darryl at malayung-malayo ito sa naunang teaser na binanggit ang pangalan ni bossing Vic Sotto.
Nakikinita naming dudumugin ang pelikula ng mga Marites at mga taong curious kung paano ang pagkakagawa ni direk Darryl sa pelikula.
Kanya-kanyang reaksyon ang netizens sa inilabas ni Direk Darryl na official trailer ng “The Rapists of Pepsi Paloma” sa FB.
Ang caption na nakalagay sa post ng VinCentiments na ni-repost ng direktor ng movie, “THE TRAILER OF THE TRUTH.
“Para sa ika-40 anibersayo ng kamatayan ni #PEPSIPALOMA.
“Abangan ang THE RAPISTS OF PEPSI PALOMA #TROPP #TROPP2025. FEBRUARY 5 • CINEMAS ONLY.”