Photos from “Shake, Rattle, and Roll XV,” “Tiktik: The Aswang Chronicles,” “Ang manananggal sa unit 23B”
MALIBAN sa pagbisita at pagdarasal sa yumaong mga mahal sa buhay, ang Halloween Season o Undas ay panahon din ng katatakutan at kababalaghan.
Dito sa Pilipinas, bahagi ng kultura ang tinatawag nating “urban legends,” ang mga lumang kwento na nagpapakilabot at ipinapasa sa iba’t-ibang henerasyon –mula sa mga nilalang ng dilim, multo at aswang hanggang sa mga misteryosong lugar na pinaniniwalaang may taglay na kapangyarihan o hiwaga.
Ang mga kwento na ito ay bahagi na ng kulturang Pilipino na bukod sa nagdudulot ng takot sa mga nakikinig, ito ay isang paraan upang mapanatiling buhay ang mga tradisyonal na paniniwala at paggalang sa hindi nakikitang bahagi ng ating kapaligiran.
Narito ang ilan sa mga kilalang urban legend na nagbibigay-kulay at takot sa ating imahinasyon.
Baka Bet Mo: Halloween 2024: Glydel Mercado ipinakulam, gustong patayin
White Lady ng Balete Drive
Isa sa pinakakilalang urban legend sa bansa ay ang White Lady ng Balete Drive sa Quezon City.
Ayon sa kwento, makikita raw ang isang babaeng nakaputi na sumasakay sa mga taxi o biglang lumalabas sa kalsada na dahilan ng aksidente ng ilang mga drayber.
May mga nagsasabing multo ito ng isang babaeng ginahasa at pinaslang sa lugar na iyon.
Tiyanak
Ang Tiyanak ay isang demonyong nagpapanggap bilang isang sanggol.
Kapag may nakarinig ng iyak ng sanggol sa gitna ng kagubatan at sinubukan itong hanapin, bigla na lang umano itong nagiging isang maliit na halimaw na umatake sa sinumang magtangkang lumapit.
Manananggal
Kilala ang Manananggal sa kakayahan nitong hatiin ang katawan sa gabi at lumipad upang hanapin ang mga biktima.
Sinasabi na ang kalahati ng katawan nito ay iniiwan sa lupa, habang ang kalahati naman ay lumilipad upang kumain ng laman-loob.
Karaniwang biktima ng Manananggal ay mga buntis at natutulog na mga tao.
Si Maligno sa Bahay na Pula ng San Ildefonso
Matatagpuan ang Bahay na Pula sa San Ildefonso, Bulacan at kinatatakutan dahil sa umano’y mga kaluluwang naliligaw na naghihiganti.
Ayon sa kwento, noong panahon ng Hapon, maraming babaeng Pilipina ang ni-rape at pinaslang ng mga sundalong Hapon sa bahay na ito.
Maraming nagsasabing nararamdaman pa rin ang presensya ng mga biktima sa lugar.
Aswang sa Capiz
Kilala ang Capiz sa mga kwento tungkol sa mga aswang, mga nilalang na kayang magbago ng anyo at maghanap ng biktima sa gabi.
Sinasabing ang aswang ay kayang maging aso, baboy, o kahit anong hayop upang itago ang tunay na anyo nito.
Baka Bet Mo: Halloween 2024: 9 panlaban sa mga aswang, pwersa ng kadiliman
Mangkukulam at Mambabarang
Ang mga mangkukulam at mambabarang ay kilala bilang mga taong may kakayahang makapanghula at gumawa ng masama sa pamamagitan ng kanilang mga mahiwagang gamit.
Sinasabi na kaya nilang magdulot ng sakit o kamatayan gamit ang mga manika, karayom, at mga orasyon.
Sa albularyo madalas nagpapagamot ang mga biktima ng kulam.
Sipit-Sipitin ng Ilocos
Sa Ilocos, may isang urban legend tungkol sa isang nilalang na tinatawag na “Sipit-Sipitin,” isang malaking halimaw na may matulis na sipit na katulad sa alimango.
Ayon sa kwento, inaatake nito ang mga taong nag-iisa sa tabing-dagat o sa kagubatan at pinapaslang gamit ang malalaking sipit nito.
Mga Nuno sa Punso
Ang mga Nuno sa Punso ay maliit na nilalang na naninirahan sa mga burol o punso.
Naniniwala ang maraming Pilipino na kapag naistorbo ang mga Nuno, sila ay gaganti sa pamamagitan ng pagdudulot ng sakit o malas.
Kaya’t kapag nakakita ng punso, karaniwan nang bumabati ang mga tao ng “tabi-tabi po” upang humingi ng pahintulot.
The Devil’s Tree ng Camiguin
Sa Camiguin, may isang puno na tinatawag nilang “Devil’s Tree” na ayon sa mga kwento, maraming nakakaranas ng kababalaghan at takot kapag dumadaan malapit dito, lalo na sa gabi.
Sinasabing ang puno ay binabantayan ng mga kaluluwang nagbabantay upang hindi ito mapinsala o matibag.
Ang Taong Ahas sa Robinsons Galleria
Kilala ang urban legend tungkol sa umano’y isang “taong ahas” na nakatira sa ilalim ng Robinsons Galleria sa Ortigas.
Ayon sa kwento, siya ay may kalahating katawan ng ahas at kalahating tao, anak daw ng isa sa mga may-ari ng mall.
Sinabi ring nagtatago siya sa mga dressing room ng mall at dinudukot ang mga babaeng naliligaw roon.
Walang patunay ang kwento, ngunit hanggang ngayon ay buhay na buhay pa rin ang alamat na ito.
Batibat o Bangungot
Ang Batibat ay isang malaking matandang espiritu na matatagpuan sa mga puno at sinasabing nananakit ng mga tao habang sila ay natutulog.
Kung ang punong tahanan nito ay maputol at gamitin bilang haligi ng bahay, ang Batibat ay nagiging sanhi ng bangungot.
Sinasabing umuupo ang Batibat sa dibdib ng natutulog dahilan upang hindi makahinga at tuluyang mamatay ang biktima.
Ang Tikbalang ng Baguio
Ang Tikbalang ay isang nilalang na may katawan ng tao at ulo ng kabayo.
Sinasabi na ang Baguio City, lalo na sa mga kagubatan at gilid ng kalsada ay tirahan ng maraming tikbalang.
Maraming tao ang nagsasabing naliligaw o nakakakita ng malaking anino sa gabi.
Kilala ang mga tikbalang sa pagkalito ng mga tao sa kanilang nilalakaran at pagdadala ng mga biktima sa mga hindi alam na lugar.