Anthony Jennings at Maris Racal
PAK na pak ang episode ng “Can’t Buy Me Love” kung saan nagtapat na ng kanyang pag-ibig si Snoop (Anthony Jennings) kay Irene (Maris Racal).
Viral ang naturang eksena dahil talagang pinag-usapan at pinagtawanan ng mga manonood ang palitan ng punchlines nina Maris at Anthony.
Sa episode 143 ng “Can’t Buy Me Love” mapapanood ang pagtungo ni Snoop sa magaganap na kasal ni Caroline (Belle Mariano) at Stephen (Darren Espanto) para aminin ang totoong damdamin para kay Irene.
Winner na winner ang naging dialogue ni Snoop kay Irene na talaga namang patok na patok sa madlang pipol.
“Irene, nagpunta rin ako rito kasi ayaw ko matulad kay Bingo. Alam ko suntok sa buwan ito, langit ka, lupa ako.
“Aircon ka, kanal ako, pero kahit na mayaman ka at ubod ka ng kaartehan ay tanggap kita.
“Gusto ko lang sabihin na hindi na ako takot kahit na isang dosenang maarteng Irene pa ang babies natin.
“Irene, magsusumikap ako para umunlad kahit ano pa sabihin nila wala akong pake, ipaglalaban kita sa mama mo, sa papa mo, kahit sino pa ‘yan. Mahal na kita, eh,” ang mahabang pagtatapat ni Snoop.
“What? What did you say?” ang hirit ni Irene.
Na sinagot naman ni Snoop ng, “Yun lang bungol. Sabi ko mahal na kita.”
“Okay,” ang tanging nasabi ni Irene.
Kaya nga lang hindi na nasagot ni Irene ang ipinagtapat ni Snoop dahil ipinahanap na siya ng kanyang pamilya para sa kanilang family picture sa church.
Huling linggo na ng “Can’t Buy Me Love” sa iba’t ibang platforms ng ABS-CBN kaya naman huwag nang bibitiw dahil marami pang shocking twists and turns sa ending.
Samantala, wishing and praying naman ang mga fans sa next projects nina Maris at Anthony at sana raw ay bigyan sila agad ng solo follow-up series ng ABS-CBN.