Lee O’Brian
WAGI ang Kapuso actress na si Pokwang matapos ipa-deport ng Bureau of Immigration (BI) ang dati niyang partner na si Lee O’Brian.
Ngayong araw, April 11, isang anunsyo ang inilabas ng Bureau of Immigration kung saan kinukumpirma nito na tuluyan nang napa-deport ang ama ni Malia pabalik sa America noong Lunes, April 8.
Matatandaang nitong nakaraang taon lamang nang mag-file ng deportation case si Pokwang laban kay Lee dahil sa pagtatrabaho nito sa Pilipinas nang walang maayos na permit mula sa gobyerno.
Ayon sa kanyang isinumiteng reklamo, nagtrabaho ang kanyang dating partner sa iba’t ibang production companies kahit na hindi ito nakakuha ng mga permit mula sa Department of Labor and Employment at Bureau of Immigration.
Baka Bet Mo: Pokwang wagi, Lee O’Brian pinapa-deport ng Bureau of Immigration
Ayon kay BI Commissioner Norman Tansingco, napa-deport si Lee pabalik ng San Francisco noong Lunes ng gabi matapos makumpirma na wala siyang pending local case sa Pilipinas.
Bilang consequence ng kanyang pagkaka-deport, kasama na ang pangalan ng dating partner ni Pokwang sa mga blacklisted sa Bureau of Immigration at hindi na ito maaaring makapasok muli sa bansa.
Matatandaang noong Disyembre 2023 nang unang nabalita ang pagkakapanalo ni Pokwang sa deportation case na kanyang isinampa laban kay Lee.
Nag-file naman ng motion for reconsideration sa kasong isinampa laban sa kanya ngunit na-deny ito.
Sa ngayon ay wala pa namang pahayag si Pokwang ukol sa tuluyang pagpapa-deport kay Lee pabalik ng Amerika.