Bagong ‘kalaban’ nina Zaijian at Xyriel bibida sa ‘Honesto’

RAIKKO MATEO

NAKAKATUWA ang bagong child star ng ABS-CBN na si Raikko Mateo, ang bibida sa teleseryeng Honesto na mapapanood na simula sa Lunes sa Primetime Bida. Ang cute-cute ng bagets, at feeling namin, susunod din siya sa mga yapak nina Zaijian Jaranilla at Xyriel Manabat.

Dumaan din sa audition ang bagets at ayon sa mga taga-Dreamscape Entertainment, nakita nila kay Raikko ang qualities ng isang bata na saktong-sakto sa role ni Honesto.

Bukod sa nangungusap na mata ng bata, napakagaling din nitong umarte, effortless kumbaga. Kaya nga bilib na bilib sa kanya ang magagaling na artistang kasama niya sa serye.

At sa pagsisinula ng Honesto sa Lunes, gabi-gabi nang ipapaaalala sa buong sambayanan ang kahalagahan ng katapatan sa pamamagitan ng napapanahong show na ito.

Ang Honesto ay iikot sa istorya ng batang si Honesto (Raikko), ang bunga ng pagmamahalan nina Diego (Paulo Avelino) at Fina (Maricar Reyes). Dahil sa kakaibang katangian na taglay ng pamilya ng kanyang ina, namana ni Honesto ang pamumula ng kanyang ilong sa tuwing siya ay nagsisinungaling.

Paano paghihiwalayin at pagtatagpuin ng katotohanan ang mga pamilya at pusong nasaktan dahil sa kasinungalingan? Mabubura ba ng kabutihan at busilak na kalooban ang lahat ng kasakiman sa mundo?

Kasama rin sa seryeng ito sina Eddie Garcia, Janice de Belen, Angel Aquino, Nonie Buencamino, Joel Torre, Melissa Ricks at Joseph Marco.

Kukumpleto sa powerhouse cast nito sina Malou Crisologo, Melai Cantiveros, Jason Francisco, Michael Conan, Josh Ivan Morales at Janna Agoncillo.

Ang Honesto ay sa ilalim ng direksyon nina Jerry Lopez Sineneng at Darnel Joy Villaflor. Ito ay ang pinakabagong obra ng Dreamscape, ang grupong lumikha ng matagumpay na inspirational drama series na May Bukas Pa at 100 Days To Heaven, phenomenal series na Walang Hanggan, at ang magtatapos nang Juan dela Cruz.

Nagsimula na kamakailan sa social media ang panawagan para sa katapatan sa pamamagitan ng pagkuha ng mga litrato ng iba’t ibang personalidad na naka-pose katulad ni Honesto at pag-post nito sa Facebook fan page ng show sa Facebook.com/Honesto.TV. Ang mga manonood na nais sumuporta sa panawagan ni Honesto ay maaring makisama sa nasabing kampanya.

Huwag palampasin ang pagsisimula ng kwentong tapat at totoo, Honesto ngayong Lunes after TV Patrol.