Vhong Navarro at Tanya Bautista
“NAPAKALAKI ng pagkukulang ko sa asawa ko,” ang pag-amin ng TV host-comedian na si Vhong Navarro sa harap ng madlang pipol sa nakaraang episode ng “It’s Showtime.”
Nagbahagi ng madamdaming mensahe si Vhong para sa kanyang misis na si Tanya Bautista bilang bahagi ng paggunita ng kanilang noontime show ngayong Semana Santa.
Aniya, ginawa na niyang “panata” ang mahalin at respetuhin ang kanyang pinakamamahal na misis na naging sandalan niya mula noong sila’y magsama bilang mag-asawa.
Abot-langit pa rin daw ang pasasalamat niya kay Tanya dahil hindi siya iniwan nito nang maakusahang nanggahasa hanggang sa makulong ilang buwan na ngayon ang nakararaan.
Baka Bet Mo: Jaclyn nag-sorry sa pagkukulang kay Andi: Anak napakatapang mo, hinahangaan kita
Pangako nga ni Vhong on national TV, babawi siya sa kanyang asawa. Napakarami raw talaga niyang realizations sa buhay noong nakulong siya kaugnay ng rape case na isinampa sa kanya ni Deniece Cornejo.
Ngunit kamakailan lamang ay ibinasura na ng Supreme Court ang naturang kaso kaya malaya na ngayon si Vhong sa kahit anong asunto.
“Ang panata ko hindi lang ngayong Holy Week, gusto ko araw-araw, iyong mahalin ko ‘yong asawa ko araw-araw… malaki ang pagkukulang ko,” sabi ng komedyante.
Dagdag pa niya, kung noon daw ay puro trabaho ang kanyang iniisip, ngayon ay naglalaan na siya ng mas mahabang oras at panahon para sa kanyang pamilya.
Kung matatandaan, last February ay ibinandera ni Vhong ang kanyang birthday message para kay Tanya na nagpakilig sa mga netizens.
“Walang sawang pagpapasalamat sa pagmamahal at pagtitiyaga mo sa akin… Mahal na mahal kita my Wonder Woman! Happy Birthday Mahal.” ang pagbati ni Vhong sa kanyang wifey.