PHOTO: Instagram/@johnprats
SAMPUNG taon nang nagsasama ang celebrity couple na sina Isabel Oli at John Prats!
At dahil diyan ay nagpaabot ng matamis na mensahe ang actor-dancer para sa pagdiriwang ng kanilang anibersaryo.
Sa Instagram, ibinandera ni John ang ilang travel at sweet photos nilang mag-asawa.
Sinabi pa niya na dahil sa kanyang misis ay nabuo ang pinapangarap niyang pamilya.
“Happy 10 years my Love! Grabe! Ang bilis ng panahon! Sa loob ng Sampung Taon, napakaraming nangyari, binayayaan tayo ng 3 anak at nabuo natin ang pamilya na pinangarap natin,” caption ni John.
Patuloy pa nya, “Hindi perpekto ang relasyon natin, pero sa lahat ng seasons ay napagtagumpayan natin.”
“Sa Hirap at Ginhawa nga ay ikaw ang aking makakasama! Maraming salamat sa pagmamahal na walang kapantay! I love you sooooo much!!! Salamat Lord God dahil lagi kang nakagabay sa amin,” aniya.
Bumati naman ang ilang kapwa-artista at kabilang diyan sina Raymart Santiago, Marc Solis, at ang kapatid ni John na si Camille Prats.
Samantala, ang ikawalong wedding anniversary ng dalawa ay ipagdidiwang sa darating na Mayo.
Taong 2015 nang ikinasal ang dalawa matapos ang dalawang taong relasyon.
Nabiyayaan sila ng tatlong anak na sina Feather, Daniel Freedom at Forest.
Related chika:
John Lloyd Cruz ibinandera ni Isabel Santos sa IG, official na nga bang magdyowa?