Robin Padilla
AMINADO si Sen. Robin Padilla na medyo tumaba siya mula nang maging senador halos anim na buwan na ngayon ang nakararaan.
Hirit ng actor-public servant, nadagdagan daw ng 10 pounds ang kanyang timbang at ramdam na ramdam na raw niya ngayon ang bigat ng katawan.
Sabi ng mister ni Mariel Rodriguez, palagi nga raw siyang sinasabihan ng doktor nila sa Senado na huwag na munang tumira ng kanin sa lahat ng meals.
Mula nga noong mag-opisina siya sa Senado ay hindi na siya nakakapag-workout dahil sa dami ng kanyang trabaho bilang bilang mambabatas.
Ito raw ang dahilan kung bakit hangga’t maaari ay hindi siya gumagamit ng elevator pagpunta sa kanyang opisina sa Senate building. Aniya, parang exercise na rin daw niya ito habang busy sa work.
At knows n’yo ba na mahilig din palang magluto si Sen. Robin? Yes, yes, mga ka-Marites kaya naman talagang kinarir din ni Mariel ang pag-aaral ng iba’t ibang putahe.
“Hindi puwedeng hindi siya magluto. Hahanapin ko yun,” ang pahayag ni Robin sa nakaraang episode ng “Korina Interviews” sa NET25.
Isa raw sa mga specialty ni Robin ay ang kare-kare, “Ang Padilla talaga, ang trademark, magaling magluto ang mga lalaki. Kare-kare ang specialty namin.”
Inusisa naman siya ni Korina kung mani ba talaga ang gamit nila sa pagluluto ng special kare-kare, “Mani talaga. Kapag ginamit ang peanut butter, estafa yun! Dapat mani na dinidikdik talaga yun.
“Nu’ng panahon ng tatay ko, nagluluto yan, kami ang nagdidikdik niyan. Kaya lang, nauso yung gina-grind na lang. Nung mga bata pa kami, nagdidikdik talaga kami,” pahayag pa ni Robin.
Ibinuking din niya na talagang pinag-aaralan din ni Mariel ang kare-kare ng namayapang ama, “Hanggang ngayon, kinokopya ni Mariel yung luto ng tatay kong kare-kare.
“Iyon ang secret para mapa-behave mo ang Padilla, kailangan marunong kang magluto ng kare-kare ni Papa.
“Iyon ang panglambing mo. Kapag nagluto ka ng kare-kare, Wow! Iyun ang reaksyon ng mga Padillang lalaki. Wow!” pahayag pa ng senador.
Karen Davila sa pagtigil ni Robin Padilla sa pag-aartista: Good move, senator!
Robin Padilla sumailalim sa heart procedure, Mariel nagpasalamat sa mga nagdasal para sa asawa