Bagsik ni ‘Neneng’ ramdam pa rin sa Pinas, ilang klase sa Northern Luzon suspendido

Ito ay dahil sa tinatawag na “trough” o extension ng bagyo na may, ayon sa press briefing ng PAGASA ngayong araw, Oct. 17 kaninang 4:00 a.m.

Kagabi pa nakaalis ng ating teritoryo ang bagyo at papunta na ito sa bahagi ng China.

Ayon kay Weather Forecaster Aldczar Aurelio, “Kagabi po around 8, lumabas na po ng PAR ang bagyong Neneng at kasalukuyan ay patuloy itong kumikilos palayo sa ating bansa at maaaring tumbuking ang Hainan province sa Southern China.”

Sinabi rin ng PAGASA na may nakataas pa ring “gale warning” o matataas na alon sa karagatan ng Northern Luzon.

Kabilang na riyan ang “seaboards” ng Batanes, Babuyan Islands, Ilocos Norte, Ilocos Sur, La Union, at Pangasinan.

Abiso ni Aurelio sa mga mangingisda, “Automatic po kapag may gale warning, bawal pong pumalaot ang ating mga kababayan dahil sa matataas na alon.”

“Ang taas ng alon po ay umaabot po ng hanggang 4.5 meters,” aniya.

Base rin sa “forecast monitoring” ng ahensya ay may nakikita silang namumuong sama ng panahon sa loob ng ating “area of responsibility” o PAR.

Posible raw na magkaroon ng panibagong “low pressure area” o LPA sa may Visayas.

“Kung mapapansin ang mga kumpulang mga kaulapan sa bandang dagat Pasipiko sa bandang east ng Visayas ay posibleng may mabuong low pressure area,” babala ng PAGASA.

Samantala, Nagsuspinde ng klase ngayong araw, Oct. 17, ang ilang paaralan sa Northern Luzon dahil sa epekto ni bagyong Neneng.

ALL LEVELS

• Kapangan, Benguet

• Abulug, Cagayan

• Aparri, Cagayan

• Sanchez Mira, Cagayan

• Camalaniugan, Cagayan

• Buguey, Cagayan

• Claveria, Cagayan (including all government work except for frontline services)

• Laoag City, Ilocos Norte

• Batac, Ilocos Norte

PRESCHOOL TO SENIOR HIGH SCHOOL

• Ballesteros, Cagayan