Miyembro ng Ben&Ben nahulog sa stage habang nagpe-perform

NAG-ALALA ang mga fans ng grupong Ben&Ben matapos malaglag sa stage ang isang member nito habang nagpe-perform sa stage.

Naganap ang aksidente nitong nakaraang Sabado sa foundation day ng isang university sa Makati City.

Base sa mga video na kumalat sa social media, makikita ang bassist ng Ben&Ben na si Agnes Reoma na todo hataw sa kanilang performance. Talagang tumatalon-talon pa ito sa stage.

Pero ilang saglit ang lumipas, bigla na lang nasira ang entablado at nabutas na naging sanhi ng pagkahulog ni Agnes.

Sunud-sunod ang tweets ng fans ng grupo at nagpahiwatig ng pag-alala sa musician. Anila, sana raw ay hindi ito masyadong nasaktan sa nangyari.

Sa video tweet ni @GeloMigBaylon, mapapanood ang nangyaring insidente at may mensaheng, “Sana hindi ka o nag ka-injury ate @agnesreoma! Still, thank you for the solid night!!”

Sa pamamagitan din ng Twitter account ng Ben&Ben, nag-post ng mensahe ang grupo tungkol sa kalagayan ni Agnes.

Nagtamo raw ng mga sugat ang kanilang miyembro pero ligtas na ito, “@agnesreoma has been injured but is safe and conscious. We’ll update you more soon.”