Payo ni ‘El Presidente’ sa Gilas Pilipinas

WALANG naipanalo ang Gilas Pilipinas sa 2019 FIBA World Cup na ikinadismaya ng buong bansa.

At wala pa ring kasiguraduhan kung makapaglalaro ang bansa sa 2020 Tokyo Olympics Qualifying Tournament dahil out of 32 teams na naglaro sa FIBA World Cup, 32nd place ang Pilipinas.

Magkakaiba ang kuru-kuro ng madla sa sinapit ng Gilas, pero para kay PBA legend Ramon “El Presidente” Fernandez, isa lang ang kanyang maipapayo: Mag-focus sa Asya.

“Concentrate muna tayo dito sa Asia. Kapag nanalo naman tayo dito it’s automatic that you go to the world competition or the Olympics,” sabi ni Fernandez na miyembro ng gold medal Philippine team sa 1973 FIBA Asia Championship.

Ayon sa PBA Hall of Famer at career leader in points, rebounds at blocks, “complete an all-star cast” ang winning factor ng Philippine delegation noong nakapaglaro siya para sa national squad.

Kasama ni Fernandez sa pambansang koponan ang kanyang mga Toyota teammates na sina Robert Jaworski Sr. at Francis Arnaiz at ang mga taga-Crispa na sina Alberto “Abet” Guidaben at William “Bogs” Adornado, gayundin ang 1972 Munich Olympians na sina Joy Cleofas, Danilo Florencio, Jimmy Mariano, Tembong Melencio at Manny Paner.

PREPARE EARLY, MORE INTERNATIONAL GAMES
Pagsusuri pa ng 65-anyos na commissioner ng Philippine Sports Commission (PSC), malaking factor pa rin ang kakulangan sa oras para sa preparasyon.

“Form the team early, expose them in international competitions so they will improve a lot. If you are able to send them to higher level of competition mas malaki ang tsansa natin na mag-improve ng mabuti,” sabi ni 19-time PBA champion Fernandez.

Kung matatandaan, 10 araw lang ang naging full training ng kumpletong Gilas team kabilang na ang pocket tournament sa Spain.

Dahil dito ay nagtamo ang Pilipinas ng nakapanlulumong 52.5-point losing margin sa kamay ng Serbia at Italy kasunod ang overtime setback kontra Angola sa group stage bago yumuko sa Tunisia at Iran sa classification phase.

Limang talo at walang panalo.

“It’s really hard to just set up a team in two weeks or one month or even two months unlike other countries mas matagal talaga preparation nila,” sabi pa ng four-time PBA MVP. “Basketball is a game of teamwork so ‘yun ang isang malaking disadvantage, kulang sa preparation.”

EUROPEAN COACH?
Sa isang panayam, sinabi ni dating Gilas coach Joseller “Yeng” Guiao na Europe ang bagong “mecca of basketball.”

Nais niya para sa koponan ang regular training doon para mapag-aralan ang European style of playing na nakasentro sa fundamentals (pass and shoot) at isolation play ang laro ng mga Europeo kumpara sa mas fancy (athletic crossovers at high-leaping slamdunks) at one-on-one play ng mga Amerikano.

Dapat na rin bang kumuha ng European coach ang Pilipinas?

Para kay Fernandez, hindi na ito kailangan pa.

“Hindi naman kailangan. We have enough good coaches here, wala namang kaibahan ang basketball sa Europe, sa Amerika. Basketball pa rin ‘yan, the basics are the same. It’s just how you maximize your talent,” aniya.

IBA NA ANG MATANGKAD
Kung susumahin, animo’y bumangga sa pader ang mas maliliit na Pinoy laban sa mga naglalakihang nakalaban sa katatapos na FIBA World Cup.

Ngunit positibo si Fernandez na pagdating ng 2023 FIBA World Cup ay kaya na ng Pilipinas na sumabay sa mga higante ng kalabang bansa.

“That’s the next big thing. Disadvantage natin ‘yung height natin although ngayon may mga kabataan na tayong naglalakihan na so hopefully we can be competitive,” sabi ng -foot-4 center/forward na nagretiro sa PBA noong 1994 bitbit ang 13 PBA Mythical First Team selection.

Isa sa kanyang inaabangan ay ang 7-foot-2 wonder na si Kai Sotto.

“He has the mobility, I’m glad that he’s going abroad to hone his skills more, that’s the best decison he made,” ani Fernandez.

Inaasahan ding magiging twin tower tandem ni Sotto si 6-foot-10 Filipino-Cypriot center AJ Edu na kasalukuyang naglalaro para sa University of Toledo ng US NCAA Division 1.