Kilalang showbiz personality bastos, walang respeto sa press

IRITANG-IRITA ang ilang katoto sa isang showbiz personality na nakatsikahan nila kamakailan.

Feeling daw kasi nito ay ang galing-galing niyang artista at ang lakas din ng loob nito na barahin ang entertainment press na nagtatanong sa kanya.

“Sana man lang naging magalang siya dahil maayos naman siyang tinatanong, hindi naman siya binabastos at related naman sa presscon ang mga tanong sa kanya. Idinadaan niya sa biro ang sagot pero halatang binabara niya lahat, wala siyang patawad kahit may edad na ang nagtatanong,” ang dire-diretsong tsika ng kilalang entertainment editor.

Hirit naman ng isa pang editor, “Nakakaano tuloy magtanong baka ganu’n din ang gawin sa akin, e, ayoko naman siyang patulan, ayokong bumaba sa level niya.”

Sa pagkakaalam namin ay ganyan talaga ang ugali ng showbiz personality na kapag hindi niya feel ang tanong ay idadaan niya sa biro at kapag hindi rin niya gusto ang reporter na nagtatanong ay binabara-bara niya sabay tatawa nang malakas.

Tama kaya ang narinig namin na hindi na raw babanggitin ng mga entertainment editor ang pangalan ng nasabing personalidad sa kahit anong item na kasali siya.