ARESTADO ang anim na Chinese national para sa pagdukot sa isa nilang kababayan, na kanilang binitbit sa isang resort sa Calamba City, Laguna, Sabado ng gabi.
Naaresto sina Xin Wang, 30; Sun Quing, 26; Hong Zhong Ah, 38; Yang Ben, 24; Zhao Da Hai, 40; at Si Cuan, 42, sabi ni Col. Eleazar Matta, direktor ng Laguna provincial police.
Nasagip naman ang biktima na si Edison Yen, 32, tubong Shanghai, China, at nanunuluyan sa Makati City.
Nagsagawa ang Provincial Intelligence Branch at Calamba City Police ng operasyon sa isang resort sa Brgy. Pansol dakong alas-11, nang makatanggap ng ulat na isang lalaki ang sumigw at humihingi ng saklolo doon.
Lumabas sa imbestigasyon na dinukot si Yen sa Makati noong Sabado ng umaga at ikinulong ng mga suspek sa resort sa Pansol, habang ang mga kaanak niya’y hiningan ng pera kapalit ng kanyang kalayaan.
Hinihinala na bago ito’y pinautang ng mga suspek ang biktima, at nang di ito makabayad ay kanilang dinukot.
Nakumpiska sa mga suspek ang limang cellphone, sari-saring identification card, P2,028 cash, mga kagamitan, at isang sports utility vehicle.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.