Meralco Bolts naungusan ang NLEX Road Warriors
Mga Laro sa Miyerkules
(Cuneta Astrodome)
4:30 p.m. Alaska vs Columbian
7 p.m. Rain or Shine vs NorthPort
NAGHULOG si Baser Amer ng krusyal na 3-pointer may 13.6 segundo ang nalalabi sa laro para tulungan ang Meralco Bolts na maungusan ang NLEX Road Warriors, 108-105, at mapanatiling buhay ang tsansa sa playoff spot sa kanilang 2018 PBA Governors’ Cup game Linggo sa Smart Araneta Coliseum.
Naunang nagsagawa si Amer ng isang three-point play matapos makuha ang ikaanim na foul ni NLEX import Aaron Fuller bago tumawag ng timeout para maisagawa ni Meralco coach Norman Black ang kanilang game-winning play.
Nagtapos si Amer na may 22 puntos, 17 dito ay ginawa niya sa ikaapat na yugto kung saan nagawang burahin ng Bolts ang 16-puntos na kalamangan ng Road Warriors.
Gumawa si Allen Durham ng 36 puntos, 18 rebound at pitong assist para sa Meralco na umangat sa 2-6 kartada.
Nanatiling nasa labas ng top eight sa team standings ang Meralco at kailangan nilang ipanalo ang nalalabing tatlong laro at umasa na maabutan ang ibang koponan na nasa ibaba ng top four para makalusot sa quarterfinals.
Nalasap naman ang Road Warriors ang ikatlong sunod na pagkatalo para malaglag sa 4-5 karta.
Nagtala si Fuller ng 31 puntos, 13 rebound at anim na assist para sa NLEX.
Nagdagdag naman si Larry Fonacier ng 21 puntos habang si JR Quinahan ay nag-ambag ng 17 puntos para sa Road Warriors.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.