JAKARTA — Pagtatangkaan ng Pinay skateboarder na si Margielyn Arda Didal na agad makapagtala ng kasaysayan para sa Pilipinas sa pagnanais nitong makapagwagi ng gintong medalya ngayong umaga sa Women’s Street Skateboarding sa ginaganap na 18th Asian Games dito sa Jakabaring Sport City Skate Park.
Kahapon ay nagtapos sa ika-13 puwesto si Jeff Gonzales abang nasa ika-17 naman si Mak Feliciano sa Men’s Street event.
Dahil dito ay sasandalan ng Pilipinas si Didal para makakuha ng medalya sa unang pagtatanghal ng sport na ito sa kada-apat na taong regional games.
Tumaas naman ang tsansa ni Didal makapagwagi ng medalya matapos na hindi sumali ang mga nangungunang skateboarder sa Asia na sina Isa Kaya at Yososomi Sakakura ng Japan.
“Margielyn is a very strong prospect for gold in the women’s street event considering the Japanese are out,” sabi ni Skateboard Association of the Philippines, Inc. president Monty Mendigoria.
Ipinaliwanag ni Mendigoria na dahil sa siyam na lamang ang kalahok ay naiba ang format ng torneyo.
“The qualifiers on Tuesday will advance to the finals the next day. This has been reduced to a ranking system to determine the order of performance in the next round,” sabi nito.
“Because this will determine who performs first to last, meaning if our girl gets a highest score tomorrow, then she will be the last to perform and gets to see how the rest fare ahead. She can then execute tricks and routines that will be superior against her opponents.”
Kumpiyansa naman ang 19-anyos mula Lahug, Cebu City na si Didal na masusunggkit ang gintong medalya.
Bilang paghahanda para sa Asian Games ay lumahok World Xtreme Games sa Minneapolis kung saan tumapos ito sa ikalawang puwesto mula sa 12 na naglaban bago sumailalim sa dalawang linggong pagsasanay sa Pennsylvania. —Angelito Oredo
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.