Joshua, Bimby hindi na maghihirap kahit mabuhay pa ng 100 taon

NASA estado si Kris Aquino na kahit walang amang nagsusustento sa kanyang mga anak ay higit pa sa sustentadong bata ang maibibigay niya para kina Joshua at Bimby.

Kayang-kaya niyang buhayin ang kanyang mga anak, kahit isandaang taon pa uling mabuhay ang mga ito ay hindi na magugutom, napaghandaan na ng aktres-TV host ang kanilang kinabukasan.

‘Yun nga lang, walang tumatayong father figure para kina Josh at Bimby, si Kris ang tumatayong tatay at nanay ng kanyang mga supling. May malaking kawalan ding nararamdaman ang magka-patid.

Pero huwag na si Kris, marami namang inang mag-isa lang na nagpalaki sa kanilang mga anak, naglakihan ang mga bata na ina lang ang kanilang kasama at wala namang naging problema.

Nasa pagdadala lang ‘yun, nasa positibong pagtanggap lang sa pangyayari, kung hahanapin mo ang wala ay saka lang nagiging mahirap ang opisyo ng pagiging tatay at nanay.

Armado si Kris, bukod sa kanyang milyones na kinikita ay may dati na siyang yaman, kaya ang pagpapalaki kina Josh at Bimby ay mas magaan.

Nasa pagpapaliwanag din sa mga anak ‘yun, mas maaga nilang malalaman kung bakit wala silang kasamang ama araw-araw ay hindi na kuwestiyon, dalawang kamay na nilang yayakapin ang katotohanan.

Huli man ay maihahabol pa rin. Happy Father’s day kay Kris Aquino!