Balita

DALAWANG lalaki ang nasawi at dalawa pang tao ang nasugatan sa magkahiwalay na insidente ng pagtama ng kidlat, sa Pangasinan at La Union nitong Linggo. Nasawi si Jonaly Damalen, 25, nang tamaan ng kidlat habang nagpapakain ng bangus sa fish cage ng isang farm sa Brgy. Baybay Norte, bayan ng Sual, dakong alas-5 ng hapon, ayon sa ulat ng Pangasinan provincial police. Kasabay ni Damalen na nagpapakain ng bangus ang kuya niyang si Jaylord, ngunit siya ang tinamaan, ayon sa ulat. Itinakbo pa si Damalen sa Western Pangasinan District Hospital ng Alaminos City, kung saan siya idineklarang patay ng doktor. Ilang minuto lang matapos iyon, nasawi ang isang lalaki at nasugatan ang dalawa niyang kasama nang tamaan ng kidlat habang naliligo sa ilog sa Brgy Parian Oeste, Bauang, La Union. Itinakbo ang tatlo sa Ilocos Training and Regional Medical Center ng City of San Fernando, ngunit idineklarang patay ng doktor si Arnold Lucero Jr., 16, ayon sa ulat ng regional police. Nilulunasan pa ang mga kasama niyang sina Daisy Joy Campos, 29, at Willy Tejada, 32.