Tama si JUDAY…KC kering-keri ang pagiging ‘kabit’

Tama si Judy Ann Santos (grabe, pero siya na nga talaga ang one and only and surviving young Superstar sa tunay na katawagan nito) nang turan niyang magaling at may bonggang future sa pagkokontrabida si KC Concepcion.

Hindi naman siguro mamasamain nina Gabby Concepcion at Sharon Cuneta kung sasang-ayunan din namin ang obserbasyon ni Juday pati na ng maraming nakakapanood ng Huwag Ka Lang Mawawala.

Hanep si KC sa pag-atake niya sa role niya sa soap. Yung mga simpleng galaw ng kanyang balikat, ang pagpiklit-pikit ng mga mata at pagbasa-basa ng labi ay kakikitaan mo ng angas bilang babaeng may pagnanasa kay Sam Milby.

Yung ekspresyon ng nagseselos, nasasaktan, naiinis at naiinggit, lahat ‘yun ay sama-sama niyang naipakita sa eksena kung saan nakilala niya ang karakter ni Juday as wife ni Sam.

Kakapit ka talaga sa kanyang atake at hindi ka maiinis dahil yung karakter naman ni Juday ay hindi basta-basta naaapi at nagpapaapi. Complementing nga sila kaya’t parang hindi mo masasabing kontrabida talaga si KC.

Hindi kami magugulat kung masusundan ang ganitong proyekto with KC as kontrabida lalo pa’t tiyak namang mapapansin ang galing niya ng mga big bosses ng ABS-CBN.

Pero ang tanong, papayag pa kaya si KC na gawin yun kapag hindi na si Juday ang kasama niya? At in fairness mga ka-BANDERA, kahit si Sam Milby ay lumalabas ang natural na galing kapag si Juday ang kaeksena. Looking forward nga kami sa kanilang banatan.