Malinis na karta itataya ngayon ng Petron, Foton

Mga Laro Ngayon
(FilOil Flying V Centre)
3 p.m. Generika vs Cignal
5 p.m. Petron vs Foton
7 p.m. F2 Logistics vs RC Cola-Army
Team Standings: Petron (4-0); Foton (3-0); F2 Logistics (2-2); RC Cola-Army (1-2); Cignal (0-2); Generika (0-4)

SALPUKAN ng mahuhusay na koponan ang mangyayari ngayon sa paghaharap ng nangunguna at wala pang talo na Petron at Foton sa 2016 Asics Philippine Superliga (PSL) Grand Prix sa FilOil Flying V Centre sa San Juan City.

Maghaharap ang Petron at Foton dakong alas-5 ng hapon matapos ang alas-3 ng hapon na bakbakan sa pagitan ng Generika at Cignal, na parehong habol ang unang pagwawagi sa prestihiyosong torneo na suportado ng Mikasa, Asics, Mueller, Senoh at Grand Sport kaagapay ang TV5 bilang official broadcast partner.

Samantala, asinta ng F2 Logistics ang ikatlong diretsong panalo kontra RC Cola-Army sa alas-7 ng gabi sa torneo na suportado rin ng Focus Athletics, KLab Cyscorpions, Foton, Petron at F2 Logistics.

Matapos na magtala ng tatlong sunod na panalo, ang Tornadoes ay siguradong mahihirapan ngayon kontra Tri-Activ Spikers na hangad mabawi ang korona at irepresenta ang bansa sa 2016 AVC Asian Women’s Club Championship sa Chinese Taipei.

Ang Petron ay manggagaling sa pagwawagi sa Cignal at mataas ang kanilang kumpiyansa dahil na rin sa magandang paglalaro nina Frances Molina, Jen Reyes, Aiza Maizo-Pontillas, Cherry Nunag, CJ Rosario, Stephanie Niemer at Serena Warner.