Donita ginawa ang lahat para ma-save ang pamilya pero nabigo

ERIC VILLARAMA AT DONITA ROSE

DEKLARADO na si Donita Rose na tuluyan na silang nagkahiwalay ng kanyang mister na si Eric Villarama.

Matagal nang pinagpipistahan ang balita ng kanilang separasyon pero gumawa pa rin pala sila ng paraang maiayos ang kanilang relasyon na nauwi rin sa wala.

Minsan nang nagtagal sa Pilipinas si Donita at nagpakalulong sa pagtatrabaho, nu’n pa lang ay marami nang nag-isip na magulo ang kanyang lovelife, pero tigas sa pagtanggi ang aktres.

Nami-miss lang daw niya ang pag-aartista at naiintindihan naman ‘yun ng kanyang mister na nasa Singapore, maayos daw ang kanilang relasyon, pahayag ng aktres na pinagtaasan lang ng kilay ng marami.

Sino raw ang maniniwalang maayos ang pagsasama nilang mag-asawa kung ganu’n na nandito siya at nasa ibang bansa naman ang kanyang mister? Isinama ni Donita ang kanyang anak dito sa Pilipinas nu’n, isa pang pahimakas na hindi maganda ang relasyon nilang mag-asawa, na ngayon lang inamin ni Donita Rose na tapos na nga.

Sayang na relasyon pero tanggap na ng aktres ang nangyari, ang mahalaga ay ginawa niya ang lahat-lahat para mabuo niya uli ang kanilang pagsasama, pero hindi ‘yun naging matagumpay.

Sa kabila ng personal na problemang pinagdadaanan niya ay napakaganda pa rin ni Donita Rose.