Garie Concepcion mas maganda sa personal kesa sa mga litrato

HINDI binibigyan ng hustisya ng mga larawan si Garie Concepcion, anak ni Gabby kay Grace Ibuna, maganda ang dalaga sa personal.

Maraming artistang mahal na mahal ng mga camera, wala silang pinipiling anggulo, pero kapag nakita mo nang malapitan ay hindi naman pala ganu’n kaganda. Kabaligtaran naman nu’n ang girlfriend na ngayon ng guwapo at magaling na singer na si Michael Pangilinan, hindi kagandahan ang mga retrato niyang naglalabasan, pero maganda si Garie sa personal.

Napakabilis talaga ng takbo ng panahon. Parang kailan lang ‘yun nang interbyuhin namin sa kanilang bahay sa San Juan ang mommy niyang si Grace Ibuna, naka-stroller pa lang nu’n si Garie, pero lumaking malaking bulas ang anak ni Gabby kay Grace.

Nasa kanya ang mga katangian ng magiging beauty queen, bukod sa kanyang kakaibang ganda ay matalino pa si Garie, bagay na bagay sila ni Michael na sa wakas ay nakatagpo na rin ng babaeng magpapaligaya sa kanya. Magkakasundo ang dalawa dahil pareho silang simple, mahilig ding kumanta si Garie, pareho nilang inilatag ang baraha ng kanilang nakaraang buhay na personal at walang naging problema.

Sa kabila ng kanyang busy schedule ay nabibigyan pa rin ng panahon ni Michael si Garie, ang dalaga ang kanyang inspirasyon na dapat lang naman, dahil galing sa isang masalimuot na relasyon ang guwapong singer. Gusto naming makitang matagumpay ang kanilang relasyon. Magtagal sana sila nang matagal na matagal na matagal na matagal.