Duterte napatino ng ‘anak’ ni Ka Freddie

KAYA pala favorite ni incoming president Rodrigo Duterte ang award-winning veteran singer na si Freddie Aguilar dahil isa ito sa dahilan kung bakit “nagtino” siya noong kanyang kabataan.

Ang kanta ni Freddie Aguilar na “Ipaglalaban Ko” ang isa sa mga ginamit ni Durerte sa nakaraang kampanya pero iba ang lyrics. Pinatugtog pa nga ito sa nakaraang niyang presscon.

Ayon kay Mayor President Digong, itinuturing niyang “singer with a social conscience” ang Filipino music icon”. Dahil daw sa mga kanta ni Ka Freddie ay maraming nai-inspire na mga Pinoy na mas mahalin pa ang Pilipinas.

“That guy is a nationalist. His love of country shows in the way he uses his songs, which are always about corruption and what ails this country – the social injustice,” pahayag ni Pangulong Duterte sa isang panayam.

Sa mga classic hits ni Freddie Aguilar, pinaka-favorite raw ni Duterte ang “Anak”, “Kasi noong narinig ko iyan, nagtino na ako ng unti. Seven years ako sa high school, sabi ko, ‘Baka mag-seven years ako rin sa college eh naloko na.’ It lets you remember your childhood and the sacrifices of your parents.” Dagdag pa ng incoming president, “Hindi niyo lang alam pero I’m a stickler for values. Ganoon lang ako magsalita.”

Samantala, kasama sana si Ka Freddie na magpe-perform sa grand victory party para kay Duterte titled “DU31: One Love, One Nation Thanksgiving Party” kahapon na ginanap sa Davao City’s Crocodile Park pero hindi na siya nakapunta. May prior commitment na raw kasi siya.

“Kung ako ang masusunod, doon (sa Crocodile Park) ako pupunta. Kaya lang may kontrata tayo na nauna doon so hindi naman ako puwedeng tumalikod doon sa kasunduan,” paliwanag ng OPM icon.