Vitangcol binasahan ng sakdal

Binasahan ng sakdal sa Sandiganbayan Third Division kahapon si Al Vitangcol, dating general manager ng Metro Rail Transit Line 3.
Walang kasamang abugado si Vitangcol ng humarap sa korte dahil wala pa umano siyang nagaganap na makapagtatanggol sa kanya sa hukuman.
Humingi si Vitangcol ng 30 araw upang makahanap ng abugado pero hindi pumayag si Sandiganbayan Presiding Justice Amparo Cabotaje-Tang-Tang na ipagpaliban ang arraignment.
Punto ni Tang walang inihaing petisyon ang kampo ni Vitangcol na maaaring makapagpaliban ng arraignment.
Isang abugado ng Public Attorney’s Office ang inatasan ng korte na tumayo para kay Vitangcol na hindi naghain ng plea kaya ang korte ang nagpasok ng not guilty plea para sa kanya.
Ayon kay Vitangcol mayroong mga abugado na ayaw tanggapin ang kanyang kaso dahil masyado itong popular.
Si Vitangcol ay nahaharap sa kasong graft kaugnay ng maanomalya umanong kontrata na pinasok nito para sa maintenance ng MRT 3 ng hindi dumaraan sa public bidding. Ang kontrata ay napunta sa Philippine Trans Rail Management and Services Corp.
Hindi rin umano inilahad ni Vitangcol na isa sa incorporators ng PH Trams— si Arturo Soriano— ay tiyuhin ng kanyang misis.