Arjo Atayde mas inuna ang mga trabaho kesa magbakasyon sa Japan kasama ang pamilya

ARJO ATAYDE

First taping day ng FPJ’s Ang Probinsiyano kahapon kaya naman excited si Arjo Atayde na may halong kaba dahil nga first time niyang mag-trabaho sa Dreamscape Entertainment.

Nag-post ng mensahe si Arjo kahapon sa kanyang social media account, anito, “First Day, I live up to You Lord.”

Aba’y oo naman, kailangang manalangin ng aktor dahil si Coco Martin ang makakasama niya sa mga eksena at ayaw din naman ng binata na magpahuli sa Hari ng Primetime dahil nakakahiya.

Ipinagpalit ni Arjo ang taping niya sa Ang Probinsiyano sa reunion trip nila ng pamilya kasama ang buong angkan as father side niya sa Osaka, Japan na umalis noong Mayo 25.

Kasama na ring ipinagdiwang ang paggaling ng daddy niyang si Papa Art na dalawang beses ngang naoperahan at ang mama naman niyang si Sylvia Sanchez na nagkaroon din ng minor operation at nagdiwang din ng kaarawan kamakailan lang.
Importante kay Arjo ang kanyang trabaho, “I know, matagal na rin plan ng family ko ang bakasyon at matagal na rin na-book, last year pa yata, e, biglang dumating itong Ang Probinsiyano, siyempre hindi ko puwedeng pakawalan ito.

“I’ve waited for three years para makasama si Coco at makatrabaho ang Dreamscape family, pakakawalan ko pa ba?” katwiran ni Arjo.

Dagdag pa ng binata, “My family naman will understand me.”

Dahil absent nga si Arjo sa trip ng kanyang pamilya ay nag-post ang mga kapatid niya ng, “We miss you @ArjoArtayde, goodluck kuya, galingan mo kuya!”

Nag-post uli ng mensahe si Arjo noong Mayo 27 nang dumating siya sa bahay nila, “Home alone!” Nag-iisa lang kasi siya sa bahay at driver lang niya ang kanyang kasama.

Tinext namin si Arjo kahapon kung saan ang location ng kanilang taping, pero hindi kami sinagot. Baka dibdiban na ang mga eksena nila sa serye.

Marami na ang naghihintay sa Ang Probinsiyano, lalo na ang mga tagahanga ni FPJ. Gusto na nilang mapanood kung paano ang magiging atake ni Coco sa karakter na talaga namang sikat na sikat noong panahon ni FPJ.

Kaya nga iyan ang talagang pinaghandaan ng Teleserye King ng ABS-CBN, hindi nga ba’t siya pa ang nag-request sa mga bossing ng Dreamscape na sumailalim siya sa matinding training, lalo na sa pagsuntok at pagbaril.

Bukod dito, hinihintay na rin ng mga manonood ang pagtatambal muli nina Coco at Angeline Quinto na na-link din noon sa aktor.

Isa pang leading lady ng aktor sa teleseryeng Ang Probinsiyano ay ang nagbabalik-Kapamilya na si Bela Padilla.