Jasmine Curtis: Kami pa rin ni Sam, walang hiwalayan!

Finally, sumagot na si Jasmine Curtis Smith tungkol sa isyung hiwalay na sila ng boyfriend niyang si Sam Concepcion.
Umugong ang balitang hiwalay na ang dalawa nang i-post ng sister ni Anne Curtis noong Araw ng mga Puso na may iba siyang kasamang nag-dinner at hindi ang boyfriend niyang si Sam.

Gayun din ang aktor na nakitang may ibang kasama sa isang mamahaling hotel. Nasulat naman namin dito sa BANDERA na itinanggi ng taong malapit kina Sam at Jasmine na hindi hiwalay ang dalawa.

Sabi ni Jasmine ng tanungin siya tungkol dito, “No, we’re still together. Magkasama kami noong Valentine.” Na tumama rin dahil nu’ng Sabado, Peb. 14, ay may technical rehearsal ang Move It Clash with the Streetdancers sa TV5 at maagang umalis si Jasmine dahil may lakad daw siya na hindi nga binanggit kung ano.

Umamin naman ang dalaga na minsan ay nagkakaroon din sila ng gusot ng boyfriend natural lang naman daw na magkaroon ng problema ang magkarelasyon pero pinag-uusapan naman nila agad ni Sam ang isyu nila para hindi na lumaki pa.

“We do have our own simple conflicts but all couples naman go through that, lalo na pareho kaming busy with our own careers,” paliwanag pa ni Jasmine.

As of now ay masaya ang dalawa sa kanilang relasyon at natutuwa rin ang TV host-actress sa resulta ng programa nila ni Tom Taus na Move It, Clash of the Streetdancers dahil inaabangan daw ito tuwing Linggo.

“Nakakatuwa kasi everywhere I go, people are talking about the dancers who are competing in ‘Move It’ that I host with DJ Tom Taus,” sabi ni Jasmine.

Samantala, magtatagisan ng galing sa pagsayaw ang mga grupong Pangasinan Movement, PUP Power Impact Dancers, FMD Xtreme, Nocturnal Dance Company, Next to Innocence Kids, FOS 417 Autonomicass Crew and Tha Mist.

At ang solo movers naman ay maglalaban sina Anykka Asistio, RJ de Claro, Charlotte Hermoso, Sergio Garcia at Chris Leonardo na mapapanood ngayong gabi, 7 p.m. sa TV5.