Jodi gaganap na Amor Powers sa remake ng Pangako Sa ‘Yo?

JODI STA MARIA

PINABULAANAN ng manager ni Jodi Sta. Maria na si Biboy Arboleda na ang aktres ang napipisil na gumanap bilang Ms. Amor Powers sa remake ng seryeng Pangako Sa ‘Yo na pagbibidahan nina Daniel Padilla at Kathryn Bernardo.

Nabanggit kasi namin kay Biboy na natutuwa kami dahil si Jodi ang gaganap sa papel noon ni Eula Valdez na isang kontrabida, kabaligtaran naman sa papel niya sa Be Careful With My Heart bilang si Maya.

Ayon kay Biboy, “Wala pang linaw ‘yan, Reggs, who told you?” balik tanong ng manager ni Jodi.

Binanggit naming narinig namin sa usapan ng mga taga-production, “It’s not true Reggs,” diin sa amin.

Sa madaling salita, hindi pa talaga confirmed ang aktres sa remake ng PSY dahil wala pang linaw.

Baka siguro nag-aalangan din ang production people ng Pangako Sa ‘Yo kung ibibigay kay Jodi ang Amor Powers role dahil nga may Be Careful With My Heart pa ang girlfriend ni Vice-Gov. Jolo Revilla.

Pero ang sitsit sa amin, magtatapos na talaga ang kilig-serye nina Maya at Ser Chief (Richard Yap) dahil wala na ring i-stretch ang istorya nito.

Nakakatawa nga bossing Ervin dahil talagang tumatalak na ang mga kamag-anak at kaibigan namin sa ibang bansa nang banggitin naming magtatapos na ang BCWMH dahil walang araw na hindi nila ito pinapanood maski may lakad sila ay tinatapos muna nila ito o kaya ay hindi na lang sila aalis ng bahay.

“Maganda kasi ang istorya, may family values,” sabi sa amin.

Oo nga naman, in fairness.