Deniece, Cedric, Roxanne bawal itanong sa presscon ni Vhong

Nakatsikahan namin ang isang taga-Star Cinema at nabanggit nito sa amin na hindi puwedeng itanong o pag-usapan ang kasong isinampa ni Vhong Navarro laban kina Cedric Lee, Deniece Cornejo at sa iba pang sangkot sa pambubugbog sa TV host-actor sa gaganaping presscon ngayong tanghali para sa pelikulang “Da Possessed” na idinirek ni Bb. Joyce Bernal.

Kaya ang balik-tanong namin sa taga-Star Cinema ay kung ano lang ng puwedeng pag-usapang isyu, “Wala lang, kumustahin n’yo lang ang movie?”

Natawa tuloy kami dahil kilala naman si Vhong na wala siyang isyu sa katawan o career maliban sa pambubugbog sa kanya. Ano nga ba ang puwedeng itanong sa kanya bossing Ervin? (Try mong tanungin Reggs, kung bakit hindi pwedeng tanungin ang tungkol kay Deniece! Ha-hahaha! – Ed)

Bigla tuloy namin naisip na baka mas may isyu pa kay Vhong ang direktor nilang si Joyce Bernal dahil ang serye niyang Paraiso’y Ikaw sa GMA 7 ay na-cut short daw, imbes na 13 weeks ito tatakbo ay naging 8 to 10 weeks na lang.

Siyempre bilang direktor ay hindi maganda iyon sa parte niya, kilala siyang box-office director tapos bigla na lang tatanggalin sa ere ang soap opera niya.

Ang balita namin, hindi ito nagri-rate at lalo pang bumagsak sa rating dahil tinapatan ito ng MiraBella ni Julia Barretto sa ABS-CBN?

Inamin nga ng nakausap naming taga-GMA 7 na sadyang pinutol na ang Paraiso Ko’y Ikaw, “Ganu’n talaga, sometimes you win, sometimes you lose. Sikat si Julia, eh, kumpara sa mga artista namin.”

Going back to Vhong, itong “Da Possessed” ang balik-horror movie niya pagkatapos ng blockbuster hit na “D’ Anothers” noong 2005.

Ang highly anticipated reunion na ito ng winning tandem nina Vhong at Joyce Bernal ay tiyak na muli na namang magpapatawa ng walang humpay sa milyun-milyong mga Pilipino.

Ang pinagsanib-puwersang down-to-earth brand of comedy ni Vhong at ang baliw-baliwang storytelling technique ni Bernal ang ay magsisilbing main attractions ng pelikula.

Isinulat ni Athena Aringo-Tengco, Ays De Guzman, Kren Yap at Antoinette Jadaone, ang “Da Possessed” ay joint project ng Star Cinema at Regal Films.

Kasama rin dito sina Smokey Manaloto, Empoy, John Lapus, Beverly Salviejo, Lito Pimentel, Joy Viado, Aaliyah Belmoro, Matet De Leon at Joey Marquez na mapapanood na sa Abril 19.